У Віцебску таксама руйнуюць касьцёл сьвятога Язэпа :: Хартыя'97 :: Навiны

Віцебскі гарвыканкам без абавязковага ўзгадненьня зь Інстытутам гісторыі Акадэміі навук замовіў "Віцебскводаканалу" пабудову каналізацыйнага калодзежа на падмурках старажытнага касьцёлу Сьвятога Язэпа.

Вялізны катлаван рыюць на забароненым месцы гістарычнага цэнтру, які быццам бы знаходзіцца пад аховай дзяржавы. Быццам бы — таму што прадпісаньне абласнога ўпраўленьня культуры аб спыненьні ўсялякіх раскопак у забароненым месцы будаўнікі праігнаравалі. Не дапамаглі ні складаньне адпаведнага пратаколу загадчыцай аддзелу аблвыканкаму Нінай Сулецкай, ні абяцанкі разабрацца старшыні гарвыканкаму Пятра Драздова, які ўважліва адсочвае хаду будаўнічых работаў, паведамляе “Радыё Рацыя”.

Зьнішчаюцца й вывозяцца ў невядомым накірунку артэфакты, якія маюць вялікую гістарычную ды археалягічную каштоўнасьць. Мяркуецца, што сярод іх могуць трапляць рэшткі пабудоваў нават ХІІ стагодзьдзя.

Каналізацыйны калодзеж робяць для прыбіральняў будучага Цэнтру вольнага часу моладзі, дазвол на пабудову якога без усякага конкурсу з падтрымкай таго ж Драздова атрымаў ад гарвыканкаму мясцовы прадпрымальнік Данілаў.

Для мясцовых чыноўнікаў разбурэньне гістарычных пабудоваў ёсьць традыцыйнай заганнай практыкай. Спачатку руйнуюць, потым зьбіраюць грошы на аднаўленьне.

Будаўніцтва цэнтру, у якім будуць праходзіць розныя забаўляльныя мерапрыемствы і, па некаторых зьвестках, нават адкрыецца казіно, вызывае пратэсты грамадзкай супольнасьці й вернікаў. Мала таго, што ён спаскудзіць сьвятое намоленае месца храмаў, якіх у гэтым куту гораду было некалькі, дык ён яшчэ зьняважыць памяць тых пачэсных грамадзянаў Віцебску, якія пахаваныя на царкоўных могілках.

Каля будаўнічай пляцоўкі раз-пораз зьбіраюцца вернікі, актыўныя маладзёны ды неабыякавыя месьцічы й чапляюць да агароджы на знак пратэсту чорныя стужкі.

У XIX стагодзьдзі касьцёл Сьвятога Язэпа пераўтвораны ў праваслаўны Сьвята-Мікалаеўскі сабор. Храм ўзарваны бальшавікамі ў 1961 годзе.