Затрыманы арганізатар «Чарнобыльскага Шляха» Юры Зянковіч :: Хартыя'97 :: Навiны

Супрацоўнікі Савецкага РУУС Менска затрымалі сёння ў Менску сябра Сойма Партыі БНФ Юрыя Зянковіча, які быў заяўнікам акцыі “Чарнобыльскі Шлях”, што мінуў у Менску 26 красавіка, у гадавіну аварыі на Чарнобыльскай АЭС. Міліцыянты склалі на яго пратакол па артыкуле новага Адміністрацыйнага кодэкса 23.34. (“парушэнне грамадскага парадку падчас правядзення масавых мерапрыемстваў”). Юрыю Зянковічу ставіцца ў віну тое, што 26 красавіка, падчас шэсця па вуліцы Сурганава, дзе праходзілі будаўнічыя працы, дэманстранты былі змушаныя выйсці на падарожную частку. Дзеянні міліцыянтаў абсалютна процізаконныя – шэсце 10 000 чалавек па ходніках вуліцы Сурганава было небяспечнае для здароўя і жыцця ўдзельнікаў “Чарнобыльскага Шляху”.

Пасля акцыі, 27 красавіка, арганізатары акцыі “Чарнобыльскі Шлях” заявілі на прэс-канферэнцыі, што маюць намер падаць у пракуратуру скаргу на дзеянні менскай міліцыі, якая падвяргала небяспецы жыццё ўдзельнікаў шэсця, выштурхоўваючы людзей на ходнікі вуліцы Сурганава, дзе вядуцца будаўнічыя працы.

Тады на прэс-канферэнцыі Юры Зянковіч адзначыў, што Менгарвыканкам сам вылучыў небяспечны маршрут для шэсця. “Аднак з міліцыяй у нас была дамоўленасць, што на ўчастку Сурганава, дзе рамантуецца ходнік, мы пройдзем па падарожнай частцы. І тое, што нас пачалі выпіхаць з дарогі – гэта проста абуральна, гэтае парушэнне ўсіх дамоўленасцяў! Гэта значыць, што намеснік начальніка ГУУС Менгарвыканкама, палкоўнік Найдзенка, які асабіста абяцаў нам дазволіць праход па падарожнай частцы, не трымае свайго слова”, – заявіў 27 красавіка Юры Зянковіч.

І вось сёння палітыка арыштавалі. Юры Зянковіч запатрабаваў адваката. Цяпер юрыст едзе ў РУУС.

Пра тое, як можна было ісці 26 красавіка па ходніках па вуліцы Сурганава, можна ўбачыць на здымках…