Лукашэнка папярэдзіў службоўцаў наконт «адседкі» :: Хартыя'97 :: Навiны

“Ні ў якім разе не будзе практыкі механічнага перасаджвання службоўцаў з аднаго крэсла ў другое. Папярэджваю: ніякіх прызначэнняў на “адседку”, як гэта было ў час Савецкага Саюза, не будзе. Мы павінны прыцягваць новыя, маладыя кадры”, – заявіў сёння А.Лукашэнка падчас прыняцця кадравых рашэнняў.

“Ніякага панства, фанабэрыі, як гэта часам бывае ў асобных кіраўнікоў. Спуску тут не будзе нікому”, – перасцярог ён.

“Укараняйце перадавыя тэхналогіі, эканомце кожную капейку, разлічвайце толькі на сябе, – паставіў задачу Лукашэнка, звяртаючыся да ізноў прызначаных прадстаўнікоў выканаўчай улады. – Праз год–два мы цалкам сыдзем ад датацый у сельскай гаспадарцы. Грошы будуць выдзяляцца толькі пад пэўныя праекты і планы, а не на абстрактныя паказчыкі тыпу “кілаграм мяса” або “літр малака”.

АФН паведамляе, што А.Лукашэнка сёння даў згоду на прызначэнне Савельева Міхаіла Генадзьевіча – намеснікам Міністра сельскай гаспадаркі і харчавання.

Бабічава Аляксандра Мікалаевіча і Гавўрыленку Віктара Васілевіча – гендырэктарамі адпаведна РУП “Клімавіцкі лікёра-гарэлачны завод” і РУП “Аршанскі ільнокамбінат”, Барысенку Аляксандра Міхайлавіча – кіраўніком адміністрацыі Ленінскага раёна Менска, Аляксейчыка Міхаіла Васілевіча – Генеральным консулам Беларусі ў Беластоку (Польшча).

Лукашэнка таксама паведаміў, што ў хуткім часе мае намер асабіста пракантраляваць, як ідуць справы ў ільнаводчай галіне краіны.