Вы находитесь на старой версии сайта "Хартия'97 - Новости Беларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
У Магілёве, Салігорске, Полацке і Асіповічах адзначылі Дзень салідарнасьці (Фота) 11:55, 17/05/2007
У Магілёве група грамадзкіх актывістаў з партрэтамі зьніклых і зьняволеных палітыкаў прайшла цэнтральнымі вуліцамі гораду. Упершыню актывісты свой салідарны шлях прайшлі бязь пільнага нагляду міліцыянтаў.
Гэтым разам актывістаў перапынялі зьдзіўленыя мінакі і распытвалі пра матывы незразумелага для іх шэсьця. Удзельнікі акцыі падрабязна апавядалі пра зьніклых і зьняволеных палітыкаў, а таксама пра перасьлед уладамі актывістаў апазыцыі, паведамляе “Радыё Свабода”.
У Асіповічах на Дзень салідарнасьці актывісты вывесілі на вышцы мабільнай сувязі бел-чырвона-белы сьцяг. Ён заставаўся навідавоку да вечара, а потым яго зьняла пажарная каманда.
Дзень салідарнасьці адзначаны таксама ў Полацку. 16 траўня ўвечары мясцовыя актывісты “Маладога Фронта” зладзілі пікет ля помніка сьвятой Эўфрасіньні Полацкай.
Удзельнікі пікету, а ўсяго ў акцыі бралі ўдзел дзесяць чалавек, трымалі запаленыя сьвечкі і партрэты зьніклых палітыкаў. Неўзабаве да помніка падышлі два міліцыянты. Яны спраўдзілі дакумэнты ў некалькіх удзельнікаў акцыі, распыталі пра мэты пікету. Гэтым разам абышлося без затрыманьняў, паведаміла “Радыё Свабода”.
16 траўня а восьмай гадзіне вечара на цэнтральнай плошчы Салігорска, як заўсёды ў Дзень салідарнасьці, стаялі людзі з партрэтамі палітвязьняў і зьніклых палітыкаў. Гэтым разам у салігорцаў была дадатковая матывацыя выйсьці на вуліцу: у адносінах да лідэра салігорскага “Маладога Фронту” Івана Шылы была распачата крымінальная справа па 193 артыкуле КК РБ – “дзейнасьць ад імя незарэгістраванай арганізацыі”.
