Вы находитесь на старой версии сайта "Хартия'97 - Новости Беларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
18 траўня а 15.00 у памяшканьні Беларускага Пэн-цэнтру (вул. Залатая Горка, 2-101) адбудзецца прэс-канфэрэнцыя з удзельнікамі вандроўнай ініцыятывы ўкраінскіх мастакоў “З табурэтам да акіяну”, што вандруюць празь Беларусь на Поўнач.
Суполка украінскіх вандроўных мастакоў “З табурэтам да акіяну” – гэта некамэрцыйны, непалітычны й нерэлігійны рух, які перасьледуе выключна ідэалы творчасьці ў стылі сучасных трубадураў-скамарохаў. Візуальна гэта выглядае так: маладыя хлопцы й дзеўчыны бяруць звычайны табурэт і нясуць яго з Кіева да аднаго з чатырох сусьветных акіянаў. Па дарозе яны граюць жывыя тэатральныя імпрэзы для жыхароў маленькіх вёсак і мястэчак, што ляжаць па шляху падарожжа.
Гэта ўжо трэцяя вандроўка суполкі “З табурэтам да акіяну”. Папярэднія былі зробленыя да Атлянтычнага (Польшча-Нямеччына-Францыя, 2005) і Індыйскага (Расея-Манголія-Кітай-Нэпал-Індыя-Шры-Ланка, 2006) акіянаў. Пра свае падарожжы хлопцы здымаюць фільмы. Адзін з апошніх – фільм-трылогія “З Табурэтам праз Гімалаі”, распавядае пра апошнюю вандроўку праз маляўнічыя мангольскія стэпы, пустыню Гобі ды Тыбет.
15 траўня “З Табурэтам да акіяну” вырушыла ў новую экспэдыцыю – да Паўночнага Ледавітага акіяну. Маршрут новай вандроўкі украінскіх мастакоў ляжыць празь Беларусь, Літву, Латвію, Эстонію, Расею, Фінляндыю ды Нарвэгію.
Пасьля прэс-канфэрэнцыі будзе зладжаны відэапаказ фрагмэнтаў з папярэдніх вандровак “З табурэтам да акіяну”.
Дзёньнік пра ход новага падарожжа можна бачыць на сайце www.taburet.com.ua
