Скарачэнне льгот негатыўна адаб`ецца на становішчы ўлады :: Хартыя'97 :: Навiны

І улада, і апазіцыя лічаць рашэнне аб скарачэнні сацыяльных ільгот пераломным, але іх прагнозы з нагоды вынікаў яго рэалізацыі моцна адрозніваюцца. Урад чакае паляпшэння эканамічнай сітуацыі. Апазіцыя разлічвае, што гэтая непапулярная мера стане прычынай росту незадаволенасці насельніцтва дзеяннямі ўлады. Верагоднасць гэтага вялікая, бо сацыяльнымі льготамі сёння карыстаецца 67% беларусаў. Абмеркаванне сацыяльнай рэформы толькі пачынаецца.

Урад разглядае скарачэнне сацыяльных ільгот як змушаную меру. “Шырокае распаўсюджванне сацыяльных ільгот вядзе да неэфектыўнага распылення бюджэтных сродкаў”, – сказала ў інтэрв`ю БелТА прадстаўніца Міністэрства працы і сацабароны Вера Смарчкова. Па яе словах, у апошнія шэсць гадоў назіраецца рост прыбыткаў насельніцтва, і за гэты час “колькасць малазабяспечаных грамадзян скарацілася больш як у 4 разы”. У той самы час падаванне празмерных аб`ёмаў ільгот прывяло да страт прадпрыемстваў транспарту і жыллёва-камунальнай сферы, гаворыць Смарчкова.

Кіраўнік аналітычнага цэнтра Мізэса Яраслаў Раманчук лічыць, што слабасць пазіцыі ўлады менавіта ў тым, што яна ўпадабала падтрымліваць прадпрыемствы фактычна за кошт скарачэння дапамогі грамадзянам.

– Захоўваючы карпаратыўныя льготы пры ўразанні сацыяльных, дзяржава паказвае, што прадпрыемствы для яго важнейшыя за людзей, – сказаў Раманчук у інтэрв`ю газеце "Завтра твоей страны".

Эксперт перакананы, што рэформа сацыяльнай сістэмы неабходная, аднак яна павінна вырабляцца на падставе дыялогу ўлады і грамадства. Адсутнасць дыялогу, па словах Раманчука, “дазваляе грамадзянам разглядаць скарачэнне льгот як самавольства службоўцаў і прад`яўляць да ўлады прэтэнзіі маральнага характару”.

На думку Раманчука, “сёння ў апазіцыі з`явіўся магутны козыр, з якім можна ісці да любой аўдыторыі, бо людзі пачынаюць разумець, што ўлада адыходзіць ад абавязальніцтваў, дадзеных у рамках сацыяльнай дзяржавы”.