Суд над Юрыем Зянковічам сёння не адбудзецца :: Хартыя'97 :: Навiны

Судовае паседжанне па справе арганізатара “Чарнобыльскага Шляху”, актывіста Партыі БНФ Юрыя Зянковіча сёння не адбудзецца з прычыны хваробы палітыка. Пра гэта прэс-цэнтру Хартыі’97 паведаміў праваабаронца Уладзімір Лабковіч. Сёння з раніцы Юры Зянковіч адчуў нядужасць і, верагодна, да панядзелка будзе знаходзіцца на бальнічным.

Адвакат Аляксандр Галіеў паведаміў суддзі Аксане Рэляевай пра хваробу Зянковіча. Новая дата суду яшчэ не прызначаная.

Нагадаем, што судовыя працэсы па справе заяўнікаў акцыі “Чарнобыльскі Шлях”, сябра Сойма Партыі БНФ Юрыя Зянковіча і актывісткі Аб`яднанай грамадзянскай партыі Валянціны Палевіковай, пачаліся ўчора ў судзе Савецкага раёна Менска.

Палітыкам ставяць у віну парушэнне артыкула 23.24 Кодэкса аб адміністрацыйных правапарушэннях (парушэнне грамадскага парадку падчас правядзення масавых мерапрыемстваў). Нагадаем, што “Чарнобыльскі Шлях” прайшоў у Менску 26 красавіка, у акцыі ўзялі ўдзел 10.000 чалавек.

Пратаколы на Палевікову і Зянковіча былі складзеныя на падставе сведчанняў супрацоўнікаў ДАІ, якія сцвярджаюць, што калона ўдзельнікаў “Чарнобыльскага Шляху” рухаючыся ад вуліцы Якуба Коласа па вуліцы Сурганава, выйшла на падарожную частку і замінала руху транспарту.

Суд над Валянцінай Палевіковай працягнецца ў панядзелак, 21 траўня.