Пра перамовы Лукашэнкі і Ахмадзінежада – ніякай канкрэтыкі :: Хартыя'97 :: Навiны

У Менску сёння адбылася сустрэча прэзідэнта Ірана Махмуда Ахмадзінежада і беларускага кіраўніка Аляксандра Лукашэнкі. Пасля двухбаковых перамоваў заяўленае, што Беларусь і Іран лічаць неабходным развіваць узаемадзеянне ў розных сектарах нафтагазавай галіны. Пра пэўныя новыя праекты, якія маглі б абмеркаваць у Менску кіраўнікі дзвюх краін, не паведамляецца, аднак камюніке па выніках перамоваў апублікаванае шырокае.

"Бакі, выказаўшы здаволенасць дасягнутымі дамоўленасцямі аб супрацоўніцтве дзвюх краін у распрацоўцы нафтавага радовішча "Джафейр" у Іране, падкрэслілі неабходнасць развіцця ўзаемадзеяння ў розных сектарах нафтагазавай галіны, стварэння нафтаперапрацоўчых вытворчасцяў, распрацоўцы нафтавых і газавых радовішчаў і будаўніцтве падземных сховішчаў прыроднага газу ў Іране", – гаворыцца ў камюніке.

Паводле дакумента, бакі, даўшы станоўчую ацэнку пашырэнню абмену тэхніка-інжынірынгавымі паслугамі паміж дзвюма краінамі, падкрэслілі важнасць "рэалізацыі сумесных праектаў па будаўніцтве ЦЭЦ і ГЭС, прамысловых прадпрыемстваў па вытворчасці нафтахімічнай, медыцынскай і іншай прадукцыі і абсталявання ў Беларусі", –паведамляе "Інтэрфакс".

Акрамя таго, гаворыцца ў камюніке, кіраўнікі дзвюх краін выказалі гатоўнасць "да ўсялякага развіцця ўзаемадзеяння ў сферы прамыслова-тэхналагічнага супрацоўніцтва, асабліва – у арганізацыі сумесных вытворчасцяў у галіне машынабудавання".

Бакі таксама "заявілі пра неабходнасць аказання падтрымкі прадпрымальнікам дзвюх краін і стварэння асновы для сумеснага ўдзелу ў прамысловых праектах у трэціх краінах".

Акрамя таго, па выніках перамоваў у Менску, бакі падпісалі пагадненне аб супрацоўніцтве ў галіне адукацыі. Падпісанае таксама пагадненне аб супрацоўніцтве паміж Нацыянальным банкам Беларусі і Цэнтральным банкам Ірана, у тым ліку ў галіне навучання персаналу.

Фота yahoo.com