Валянціна Палевікова: Трэба судзіць міліцыю :: Хартыя'97 :: Навiны

Сёння суддзя Савецкага раёна Людміла Севасцьян прысудзіла сябра Палітрады Аб’яднанай грамадзянскай партыі Валянціну Палевікову да штрафу ў 25 базавых велічынь. В.Палевікова прызнаная вінаватай у тым, што падчас "Чарнобыльскага Шляху" 26 красавіка ўдзельнікі акцыі выходзілі на падарожную частку вуліцы Сурганава.

– Судзіць трэба не арганізатараў акцыі, – заявіла “Товарищу” В.Палевікова, адна з заяўнікаў "Чарнобыльскага Шляху", – а міліцыянтаў, якія не выконвалі свае службовыя абавязкі, а часам і правакавалі людзей да тых дзеянняў, у якіх мяне сёння вінавацілі.

Па словах актывісткі АГП, сёння прадстаўнікі суду маглі ўпэўніцца ў гэтым:

– На відэазапісы выдатна відаць, што людзі былі змушаныя абыходзіць участак на вуліцы Сурганава, які рамантаваўся. Да таго ж там па ходзе руху стаяў МАЗ, тры міліцэйскія машыны. Акцыя была мірнай, – падкрэсліла В.Палевікова, – але падчас шэсця "людзі ў чорным" увесь час правакавалі ўдзельнікаў шэсця. Пасля яе заканчэння, як усім вядома, яны свайго дамагліся. Пэўна, іх выпускаюць на мірныя вулічныя акцыі для спецыяльнай трэніроўкі на людзях.

В.Палевікова адзначыла, што суд прыняў да ўвагі сведчанні толькі аднаго боку.

– Пратакол месцамі выглядаў проста як бязглуздзіца, – сказала яна. – Цяпер я буду кансультавацца, ці мае сэнс абскардзіць рашэнне суду. Хутчэй за ўсё, я падам скаргу. Разумею, што ў нашай краіне дамагчыся справядлівасці практычна немагчыма, але для гісторыі хай скарга і рашэнне па ёй захаваюцца.