На свабоду могуць выйсці два палітвязня – Мікалай Статкевіч і Павал Севярынец :: Хартыя'97 :: Навiны

Сёння ў Наваполацку і Мар’інай Горцы павінны адбыцца суды, на якіх будуць разгледжаныя рэкамендацыі аб умоўна-датэрміновым вызваленні палітвязняў Паўла Севярынца і Мікалая Статкевіча. Суд па справе аб вызваленні Севярынца адбудзецца ў 14.30. Мікалаю Статкевічу сёння таксама загадалі прыехаць пасля абеду ў Мар’іну Горку.

Лідэр Беларускай сацыял-дэмакратычнай партыі (Народная Грамада) Мікалай Статкевіч і моладзевы лідэр Павал Севярынец былі прысуджаныя да двух гадоў абмежавання свабоды за арганізацыю ўвосень 2004 года акцый пратэсту супраць фальсіфікацый вынікаў рэферэндуму, які дазволіў Лукашэнку балатавацца ў прэзідэнты неабмежаваную колькасць разоў.

Статкевіч адбывае пакаранне ў вёсцы Блонь Пухавіцкага раёна, дзе працуе слесарам-рамонтнікам, а Павал Севярынец – у вёсцы Малое Сітна Полацкага раёна Менскай вобласці, дзе займаецца нарыхтоўкай лесу.

Не выключана, што сёння палітыкаў вызваляць. Аднак Мікалай Статкевіч паведаміў прэс-цэнтру Хартыі’97, што абавязковай умовай яго вызвалення стала напісанне заявы на імя намесніцы кіраўніка Адміністрацыі прэзідэнта Наталлі Пяткевіч з просьбай аб пераглядзе справы.

“Я не буду пісаць гэтую заяву. Мая справа – палітычная. Я разумею, што ўлады сёння загнаныя ў кут. Ад іх патрабуюць вызвалення палітвязняў, інакш пагражаюць пазбавіць гандлёвых прэферэнцый Еўразвяза. Але я не хачу быць заложнікам, за якога заплацяць, няхай, і 400 мільёнаў даляраў (столькі Беларусь будзе губляць штогод, калі яе выключаць з Генеральнай сістэмы прэферэнцый – заўв. Хартыі’97). Я упэўнены, што сёння мяне вызваляць, але потым зноў пасадзяць, як і шмат іншых людзей”, – перакананы Статкевіч.