КДБ працягвае хаваць праўду пра сталінскія рэпрэсіі :: Хартыя'97 :: Навiны

Камітэту дзяржаўнай бяспекі Беларусі нічога не вядома пра масавы расстрэл прадстаўнікоў беларускай інтэлігенцыі ў ноч на 30 кастрычніка 1937 года. Пра гэта гаворыцца ў лісце кіраўніцтва камітэта сустаршыням грамадскага аргкамітэта па ўвекавечанні памяці ахвяр рэпрэсій перыяду сталінізму, паведаміў БелаПАН сакратар аргкамітэта Уладзімір Раманоўскі.

Па яго словах, ліст быў атрыманы ў адказ на запыт, накіраваны ў КДБ 16 красавіка, за подпісамі сустаршыняў камітэта Радзіма Гарэцкага, Уладзіміра Коласа і Васіля Якавенкі аб высвятленні месцаў пахавання 69 прадстаўнікоў беларускай інтэлігенцыі, расстраляных супрацоўнікамі НКУС у ноч на 30 кастрычніка 1937 года. Аналагічны запыт быў таксама накіраваны ў МУС Беларусі.

Даследнік тэмы сталінскіх рэпрэсій Ігар Кузняцоў паведаміў БелаПАН, што 18 траўня яму патэлефанаваў супрацоўнік Міністэрства ўнутраных спраў Уладзімір Антонаў, які прапанаваў выслаць спіс рэпрэсаваных на расейскай мове, бо ў МУС адсутнічаюць магчымасці для перакладу беларускамоўнага спісу. "З прычыны таго, што, па словах У.Антонава, міністэрства не валодае звесткамі пра ахвяры, плануецца накіраваць спіс у адпаведныя расейскія структуры. Аднак расейскія архівы могуць валодаць толькі спісамі расстраляных, але не дадзенымі пра іх пахаванні. Бо ўся інфармацыя такога роду знаходзіцца ў архіве КДБ Беларусі, айчыннаму МУС трэба б было накіраваць запыт у гэтае ведамства", – лічыць навукоўца.