Страйк механізатараў спынены, але часова :: Хартыя'97 :: Навiны

Сёння механізатары сельскага кааператыва “Варняны” Астравецкага раёна Гарадзенскай вобласці выйшлі на працу. У 19.00 мусіць прайсці сход з удзелам працоўных, кіраўніцтва кааператыва і начальніка ўпраўлення сельскай гаспадаркай Астравецкага райвыканкама Адама Кавалько.

“Мы вырашылі выйсці на працу. Шмат людзей запалохалі, на шматлікіх націснулі, так што большасць з нас вырашылі выйсці на працу. Сёння будзе сход. Што на ім будзе абмяркоўвацца – выкананне нашых патрабаванняў ці наадварот – наша звальненне – невядома. Не выключана, што самых актыўных з нас звольняць. Але мы будзем пратэставаць, калі такое здарыцца. Так што пра планы на будучыню будзем ведаць сёння ўвечары”, – паведаміў адзін з удзельнікаў страйку прэс-цэнтру Хартыі’97.

43 механізатары сельскага кааператыва “Варняны” Астравецкага раёна Гарадзенскай вобласці 21 траўня абвясцілі страйк і адмовіліся выходзіць у поле. Пратэст выкліканы пазапраўнымі звальненнямі, нявыплатамі прэмій і зразаннямі зарплаты, якія практыкуе цяперашняе кіраўніцтва СПК “Варняны”.

Механізатары патрабуюць, каб старшыня кааператыва “Варняны” Уладзіслаў Рук напісаў заяву аб звальненні. Метады кіравання Рука механізатары лічаць пазапраўнымі. На іх думку, старшыня кааператыва не займаецца развіццём прадпрыемства, а аддае перавагу эканоміі сродкаў за кошт зарплаты працоўных.