Беларускія службоўцы стаміліся ад таго, што іх не пускаюць у Еўропу :: Хартыя'97 :: Навiны

Газета “Московский Комсомолец” сёння адзначае дзіўную дату – 10-годдзе статуту так званага “саюза” Расеі і Беларусі. У артыкуле “Усё ніяк не сабяруся” аглядальнік Міхаіл Растоўскі кажа пра першачарговую задачу Расеі не выпусціць з-пад свайго ўплыву Беларусь, пра неабходнасць “намёртва сашчапіць Беларусь і Расею эканамічнымі ніткамі”. Сярод усяго гэтага імперскага трызнення – цікавы факт. Аўтар адзначае, што беларускія службоўцы “стаміліся ад таго, што іх не пускаюць у Еўропу і трымаюць за сатэліта Расеі”.

“Московский Комсомолец” піша, што рэжым Лукашэнкі – своеасаблівы кокан, які ізалюе краіну ад працэсаў, якія адбываюцца ва ўсёй астатняй Еўропе. Але ўнутры гэтага кокана ўсё роўна адбываюцца падспудныя перамены. І большасць з іх – не на карысць Расеі.

“Антырасейскія настроі сярод насельніцтва Беларусі знаходзяцца цяпер на ўзлёце, – сказаў журналісту “МК” добра дасведчаны наконт становішча ў Менску буйны расейскі знешнепалітычны службовец. – 10 гадоў таму, калі Расея гуляла ў хакей з якой-небудзь замежнай камандай, амаль усе ў Беларусі балелі за расейцаў. Цяпер амаль выключна за замежнікаў”.

Трывожнай для Расеі з`яўляецца сітуацыя і ў службоўскіх асяродках Беларусі.

“Дзяржаўны апарат Беларусі можа ў цэлым пахваліцца высокапрафесійным і стабільным складам, – працягнуў пастаноўку дыягназу ўжо згаданы знешнепалітычны службовец у Маскве. – Наладзіць гэты палітычны механізм на шчыльную працу з Захадам – раз плюнуць. Усе стаміліся ад таго, што іх не пускаюць у Еўропу і трымаюць за сатэліта Расеі”.