Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Страйк механізатараў сельскага кааператыва “Варняны” Астравецкага раёна Гарадзенскай вобласці спынены. Учора ўвечары ў кааператыве адбыўся сход, на якім прысутнічалі службоўцы Астравецкага райвыканкама. Патрабаванні механізатараў не выкананыя. Больш за тое, “завадатараў” страйку пагражаюць звольніць.
“Людзей запалохалі, вось і ўсё. Вышлі ўсё на працу. А учора на сходзе службоўцы ўвогуле заявілі, што мы павінны быць удзячныя, што нас не звольнілі… Старшыня кааператыва сказаў, што ва ўсім вінаватыя асобныя “бунтары”, што насамрэч у кааператыве ў нас усё добра. Службоўцы з райвыканкама яго падтрымалі. Карацей, рука руку мые. Цяпер працуем у чаканні звальнення самых актыўных з нас”, – паведамілі механізатары прэс-цэнтру Хартыі’97.
43 механізатары сельскага кааператыва “Варняны” Астравецкага раёна Гарадзенскай вобласці 21 траўня абвясцілі страйк і адмовіліся выходзіць у поле. Пратэст быў выкліканы пазапраўнымі звальненнямі, нявыплатамі прэмій і уразаннем зарплаты, якія практыкуе цяперашняе кіраўніцтва СПК “Варняны”.
Механізатары патрабавалі, каб старшыня кааператыва “Варняны” Уладзіслаў Рук напісаў заяву аб звальненні. Метады кіравання Рука механізатары лічаць пазапраўнымі. На іх думку, старшыня кааператыва не займаецца развіццём прадпрыемства, а аддае перавагу эканоміць сродкі за кошт зарплаты працоўных.
