Мілінкевіч не будзе высоўвацца ў сустаршыні Палітрады дэмсілаў :: Хартыя'97 :: Навiны

Цяперашні старшыня Палітрады аб`яднаных дэмакратычных сілаў (АДС) Аляксандр Мілінкевіч не будзе высоўвацца ў сустаршыні Палітрады АДС на Кангрэсе дэмакратычных сілаў. Такое рашэнне 23 траўня прынялі ўдзельнікі паседжання рады руху "За Свабоду", які цяпер ствараецца.

"Сённяшні шлях аб`яднаных дэмакратычных сілаў – гэта не шлях, які можа дапамагчы змяніць сітуацыю ў краіне. Праз супярэчнасці на кангрэсе апазіцыя яшчэ больш зойдзе ў тупік. Круглымі сталамі арганізаваць працу немагчыма. Я іду на кангрэс, каб паказаць усім, што тая форма, якую яны абіраюць, слабая і недзеяздольная. Мы ідзем, каб паказаць таксама, што мы не разбуральнікі, але мы крытычна ставімся да сённяшняй сітуацыі ўнутры дэмакратычных сілаў і гатовыя гэта змяняць", – падкрэсліў А.Мілінкевіч.

Тым не менш прыхільнікі А.Мілінкевіча вырашылі стварыць на кангрэсе фракцыю "Рэгіёны за Свабоду", каб паказаць падтрымку свайму лідэру. Кіраўніком фракцыі абраны Віктар Карняенка, намеснікам – Аляксей Кавалец і сакратаром – Галіна Скараход.

"Фракцыя "Рэгіёны за Свабоду" – гэта людзі, якія падтрымліваюць рух "За Свабоду" і А.Мілінкевіча. Мы здольныя паказаць, што мы аб`яднаная сіла", – заявіў В.Карняенка..

На паседжанні таксама разглядаліся стратэгія і кампаніі руху "За Свабоду", паведаміла прэс-служба А.Мілінкевіча.