Сяргей Балыкін: «Ніхто не гарантуе, што ў нашай краіне не пачнецца абвал рубля» :: Хартыя'97 :: Навiны

Кошт квадратнага метра жылля ў Менску пераваліў за $2 тыс і па прагнозах аналітыкаў будзе расці далей. Беларускі ўрад мае намер утаймаваць рост цэнаў, але эксперты не ўпэўненыя ў поспеху ўлад.

Аляксандр – будаўнік. Займаецца рамонтам жылля ў Менску і пры гэтым лічыць, што сёння “неяк купіць кватэру – гэта проста нерэальна”, паведамляе “Нямецкая хваля”.

Пры цане ж квадратнага метра жылля ў 2000 умоўных адзінак марыць, што калі-небудзь атрымаецца назапасіць на ўласную кватэру, не прыходзіцца. На думку Аляксандра сёння набыць кватэру могуць толькі:

“Новыя расейцы, то бок бізнэсмены. Яны купляюць кватэры, у асноўным з мэтай перапродажу. Гэта таксама стварае даволі вялікі ажыятаж і попыт на рынку. Я так думаю. А так – ніхто. Цешча мая купіла кватэру. Яна ўлезла ў даўгі на 40 наступных гадоў”.

Кіраўніцтва краіны, у асобе Аляксандра Лукашэнкі, таксама заклапочанае ростам цэнаў на кватэры. Нядаўна прэзідэнт азадачыў гэтай праблемай і старшын. Нацбанку Пятра Пракопавіча, які курыруе сферу жыллёвага будаўніцтва. Згодна з даручэннем Лукашэнкі, Пракопавіч павінен дамагчыся паніжэння кошту будаўніцтва жылля і дакласці пра вынікі да 1 жніўня.

Аднак, як лічыць будаўнік Аляксандр, не выдаткі пры ўзвядзенні жылля ў асноўным прадвызначаюць яго высокую цану:

“Я як будаўнік бачу, што сабекошт матэрыялаў і будаўнічых прац у абласных цэнтрах, у Магілёве, у Гомелі, у Гародні, такі ж самы. Але тут у Менску вельмі завышаная цана, пэўна, у сувязі з тым, што вельмі шмат іншагародніх прыязджае і купляе кватэры. Таму што адзіны горад, дзе ёсць праца – гэта Менск”.

Юрыст і эканаміст Сяргей Балыкін згодны з тым, што шмат беларусаў спрабуюць асесці ў Менску менавіта дзякуючы вялікаму рынку параўнальна высокааплатнай працы. А рынак нерухомасці на такую працоўную міграцыю рэагуе па-свойму – ростам цэнаў. Пры гэтым, па словах Балыкіна, банкаўскія крэдыты, якіх цяпер выдзяляюць вельмі шмат, робяць шматлікіх беларусаў плацежаздольнымі. Так кватэры ператвараюцца фактычна ў скарбонкі для зберажэнняў:

“Можна, вядома, класці грошы на рахунак у банку, але, па-першае, ён не дае такіх высокіх працэнтаў, як інвестыцыі ў жыллё, а, па-другое, ніхто не гарантуе, што ў нашай краіне не пачнецца абвал беларускага рубля”.

У цэлым жа, як лічыць Балыкін:

“Еўрапейскія цэны на жыллё ў Менску сведчаць, першым чынам, пра дзікі попыт”.

І гэта попыт, упэўнены эксперт, неабходна задавальняць.