Мілінкевіч: Без рэформаў эканоміка не здольная забяспечыць сацыяльныя стандарты :: Хартыя'97 :: Навiны

“Сваім рашэннем беларускі “парламент” яшчэ раз прадэманстраваў, што ён кішэнны і несамастойны. Пазбаўленне ільготаў не знізіць глыбіню беднаты і не падвысіць узровень жыцця маламаёмасных катэгорый насельніцтва нашай краіны”, - заявіў старшыня Палітрады аб`яднаных дэмакратычных сілаў Аляксандр Мілінкевіч у адказ на прыняцце Палатай прадстаўнікоў праекта закона "Аб дзяржаўных сацыяльных ільготаў, правах і гарантыях для асобных катэгорыяў грамадзян".

“У кожнай краіне ёсць сацыяльна неабароненыя групы насельніцтва, якія маюць абмежаваныя матэрыяльныя рэсурсы і яны, як ніхто іншы патрабуюць сацыяльнай дапамогі. Гэта малазабяспечаныя грамадзяне, шматдзетныя і няпоўныя сем`і, адзінокія інваліды і пенсіянеры, студэнты і беспрацоўныя. Ільготы аказваюць адчувальныя ўплывы на іх матэрыяльнае становішча, а гэта ў сваю чаргу спрыяе скарачэнню ўзроўню беднасці і паляпшэнню дэмаграфічнай сітуацыі.

Эканоміка, нягледзячы на прапагандысцкія штампы, знаходзіцца ў цяжкім стане. Без рэформаў, яна не здольная забяспечыць сацыяльныя стандарты. Нельга зліквідаваць усе льготы пакуль сацыяльная дапамога не стане адраснай. Сацыяльна-эканамічная палітыка ўрада павінна быць накіраваная на падвышэнне ўзроўню жыцця насельніцтва на аснове павялічэння рэальных прыбыткаў грамадзян.

Разам з правядзеннем сацыяльна-эканамічных рэформ стратэгічнай задачай дзяржавы павінна з`яўляцца павялічэнне памеру заробку, якая павінна быць дастатковай не толькі для задавальнення цякучых патрэбаў у сілкаванні, вопратцы, але і патрэбаў у паўнавартасным адпачынку, а таксама ў фармаванні сваіх зберажэнняў”, -- лічыць палітык.