Удзельніцу акцыі супраць адмены ільгот збілі :: Хартыя'97 :: Навiны

Гісторыя з нападам на моладзевую актывістку Таццяну Цішкевіч у студгарадку БДУ 23 траўня мела працяг. Як высветлілася, у той самы дзень увечары дзяўчыне стала дрэнна, «хуткая» даставіла яе ў 10-ы клінічны шпіталь, дзе яе абследавалі лекары, зафіксаваўшы страсанне галаўнога мозгу (ЧМТ лёгкай ступені). Дзяўчыне была прапанаваная шпіталізацыя, але яна адмовілася. Лекары параілі звярнуцца ў міліцыю.

Учора, 24-го траўня, Таццяна звярнулася ў бліжэйшае аддзяленне міліцыі – УУС Кастрычніцкага раёна, дзе ў дзяжурнай частцы паведамілі, што яе ўжо чакаюць, але ў аддзеле па барацьбе з арганізаванай злачыннасцю № 37 Маскоўскага раёна, куды, як высветлілася, з шпіталя перадалі матэрыялы справы.

Там і сапраўды чакалі Таццяну. Міліцыянт з`едліва спытаў, хто напаў на дзяўчыну і ці не былі гэта людзі ў форме АМАПа.

Пасля таго, як заява была прынятая, пацярпелая была накіраваная ў судмедэкспертызу для здымання збіцця. На руках і нагах у дзяўчыны шматлікія сінякі.

23 траўня акцыя «Не адмене льгот!» у студэнцкім мястэчку БДУ каля плошчы Незалежнасці скончылася затрыманнем двух чалавек і нападам людзьмі ў цывільным на дзяўчыну, як высветлілася пазней, Таццяну Цішкевіч.

Падчас акцыі Таццяна знаходзілася сярод удзельнікаў, пасля таго як усе разышліся, двое ў цывільным накінуліся на яе і, як паведаміла прэс-цэнтру Хартыі’97 сама Таццяна, сталі хапаць яе “за рукі, шыю, спрабавалі сілком кудысьці цягнуць”.

“Натуральна, я спалохалася, стала клікаць на дапамогу. Да шчасця, мінакі хутка зрэагавалі на мой крык, і хуліганам давялося ўцячы”, – распавяла дзяўчына.

Відаць, гэта дзейнічалі супрацоўнікі АМАПа ці КДБ.