Махмуд Ахмадзінежад: «У цёплых стасункаў Ірана і Беларусі ёсць ворагі» :: Хартыя'97 :: Навiны

Прэзідэнт Ірана Махмуд Ахмадзінежад перакананы, што ніякі знешні ўплыў не здольны сапсаваць стасункі Ірана і Беларусі. "Ніякі знешні ўплыў не здольны сапсаваць нашы стасункі, пры такіх стасунках бакі не гандлююцца", – заявіў М.Ахмадзінежад у інтэрв`ю беларускаму тэлебачанню, якое транслявалася ў нядзелю ўвечары.

Прэзідэнт Ірана лічыць, што "ў цёплых стасункаў Ірана і Беларусі ёсць ворагі, але яны нічога не здольныя зрабіць".

Ён падкрэсліў, што "нашы народы самастойныя і павінны падтрымліваць адзін аднаго", паведамляе “Інтрэфакс”.

Кажучы пра беларуска-іранскія стасункі, М.Ахмадзінежад зазначыў, што "з палітычнага пункту гледжання нашы стасункі знаходзяцца на высокім узроўні, мы павінны зрабіць усё магчымае, каб на гэты ўзровень выйшлі нашы і гандлёва-эканамічныя стасункі".

"Ні я, ні беларускае кіраўніцтва незадаволенае цяперашнім таваразваротам. У абедзвюх краін ёсць вялікі патэнцыял і магчымасці, каб павялічыць таваразварот у некалькі разоў", – сказаў прэзідэнт Ірана.

"Цяпер мы закладваем першыя камяні ў нашы гандлёва-эканамічныя стасункі. І дзень за днём робім усё магчымае, каб яны развіваліся ўсё больш", – адзначыў М.Ахмадзінежад.

"Мы дасягнулі сумесных пагадненняў па энергетыцы, капіталаўкладаннях, інвестыцыях, а таксама ў галіне гандлю, адукацыі, навуковых даследаванняў, транспарту і банкаўскіх сувязях", – сказаў ён.

М.Ахмадзінежад знаходзіўся з афіцыйным візітам у Беларусі 21–22 траўня.

Падчас знаходжання ў Менску прэзідэнт Ірана сустрэўся з Аляксандрам Лукашэнкам, першым віцэ-прэм`ерам урада Беларусі Уладзімірам Сямашкам, спікерам палаты прадстаўнікоў Нацыянальнага сходу Уладзімірам Канаплёвым.