Барацьба з беспакаранасцю забойстваў журналістаў :: Хартыя'97 :: Навiны

Міжнародная федэрацыя журналістаў (МФЖ), пачала глабальную кампанію супраць беспакаранасці забойстваў журналістаў і супрацоўнікаў сродкаў інфармацыі. Пра гэта было абвешчанае ў Маскве на спецыяльнай сесіі Сусветнага кангрэсу МФЖ, у якім узялі ўдзел больш як 500 прадстаўнікоў сусветнай журналісцкай супольнасці.

Усевалад Багданаў, старшыня Саюза журналістаў Расеі аддаў належнае 215 расейскім журналістам, забітым з 1990 года. Ён заклікаў расейскія ўлады пакласці канец беспакаранасці вінаватых у гэтых забойствах.

Паводле дакладу “Забойства весніка” (“Killing the Messenger”), апублікаванаму ў сакавіку 2007 года Міжнародным інстытутам бяспекі навін (INSI), больш як 1000 журналістаў ва ўсім свеце былі забітыя за апошнія 10 гадоў, але толькі ў 27 выпадках забойцы былі пакараныя, адзначае МФЖ.

Генеральны сакратар МФЖ Айдан Уайт, які старшынстваваў на канферэнцыі, сказаў: “Правал у справе выяўлення і прыцягнення да адказнасці забойцаў журналістаў збольшага выкліканы карупцыяй і некампетэнтнасцю. Найбольш важнай прычынай, аднак, з’яўляецца адсутнасць ва ўлады палітычнай волі да абароны журналістаў і свабоды слова”.

Міклаш Харашці, прадстаўнік па свабодзе СМІ Арганізацыі па бяспецы і супрацоўніцтву ў Еўропе (АБСЕ), назваў галоўнымі прычынамі забойстваў журналістаў абыякавасць улад і крыміналізацыю журналістыкі. Харашці заклікаў да стварэння спецыяльнага міжнароднага органа для расследавання забойстваў журналістаў. Ён таксама заклікаў урады выключыць паклёп і абразы з колькасці дзеянняў, за якія прадугледжаная крымінальная адказнасць. Міклаш Харашці заявіў, што неабходна ўвесці крымінальную адказнасць за публічныя заклікі да нападу на журналістаў.

Айдан Уайт абвясціў, што ў сувязі з жорсткім забойствам у кастрычніку 2006 года аглядальніка расейскай “Новой газеты” Ганны Паліткоўскай была сфармаваная кааліцыя журналісцкіх саюзаў і арганізацый, якія абараняюць свабоду друку, якая павінна стварыць міжнародную камісію па расследаванні акалічнасцяў смерці журналістаў у Расеі.

У МФЖ уваходзяць больш як 500 тысяч журналістаў ва ўсім свеце, інфармуе ІА ПРИМА-News.