Амбасадар ЗША: Толькі пасьля вызвалення ўсіх палітзьняволеных будуць магчымыя перамовы зь беларускімі ўладамі :: Хартыя'97 :: Навiны

Прысутныя на месцы падзеі перад Савецкім судом Менска замежныя дыпляматы ў інтэрвію “Радыё Свабода” пракамэнтавалі прысуд актывістам “Маладога Фронта”. Амбасадар ЗША Карэн Сьцюарт выказала надзею, што ў хуткім часе могуць выйсьці на волю палітвязьні, у тым ліку лідэр “Маладога фронту” Зьміцер Дашкевіч. Пасьля таго, як будуць вызваленыя ўсе палітзьняволеныя, будуць магчымыя перамовы зь беларускімі ўладамі аб прывядзеньні беларускага заканадаўства ў адпаведнасьць нормам міжнароднага права, зазначыла сп-ня Сьцюарт.

Кіраўнік місіі АБСЭ ў Менску Оке Пэтэрсан заявіў, што артыкул 193 Крымінальнага кодэксу выкарыстоўваецца ўладамі як рычаг ціску выбарачна супраць асобных грамадзянаў.

Нагадаем, што 4 жніўня 2006 году былі абвешчаныя прысуды сябрам незарэгістраванай арганізацыі “Партнэрства”. Як і актывісты “Маладога фронту”, яны былі абвінавачаныя паводле артыкулу 193-1 Крымінальнага кодэксу “Дзейнасьць ад імя незарэгістраванай арганізацыі”. Аляксандар Шалайка і Эніра Браніцкая былі асуджаныя на 6 месяцаў пазбаўленьня волі, Цімафей Дранчук – на год калёніі агульнага рэжыму, Мікола Астрэйка – на два гады калёніі агульнага рэжыму.

15 верасьня 2006 году лідэр незарэгістраванай арганізацыі “Малады Фронт” Дзьмітры Дашкевіч быў асуджаны паводле артыкулу 193-1 да 1 года і 6 месяцаў зьняволеньня ў калёніі агульнага рэжыму.

Суд Савецкага раёну Менску сёньня прысудзіў актывісту “Маладога фронту” Зьмітру Хведаруку штраф памерам 1 мільён 240 тысячаў беларускіх рублёў ( 578 даляраў ЗША), яго паплечнікам Алегу Корбану, Аляксею Янушэўскаму і Барысу Гарэцкаму - па 930 тысячаў рублёў (433 даляры) кожнаму. Актывістка “Маладога фронту” Наста Палажанка атрымала папярэджаньне.