Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
«Gazetа Wyborczа»: Беларускі рэжым адкручвае гайкі 13:48, 29/05/2007
«Беларускі рэжым адкручвае гайкі» – такі загаловак мае артыкул у сёньняшнім нумары польскай «Gazety Wyborczej», прысьвечаны працэсу над актывістамі арганізацыі «Малады фронт».
«Gazetа Wyborczа» піша, што за прыналежнасьць да незарэгістраванай арганізацыі «беларускі рэжым заўсёды без ваганьняў садзіў у турмы». А гэтым разам «пракурор запатрабаваў толькі штрафу».
«Гэтым разам міліцыянты таксама ня зьбілі і не разагналі некалькі сотняў маніфэстантаў, якія перад будынкам суду дамагаліся вызваленьня сваіх паплечнікаў. Рэжым апынуўся ў цяжкай сытуацыі і таму становіцца больш мяккім», – падае штодзёньнік меркаваньні экспэртаў.
«Wyborczа» называе таксама «абсурдным» абвінавачаньне на адрас актывістаў Маладога Фронту, бо арганізацыю «неаднаразова спрабавалі афіцыйна зарэгістраваць», паведамляе «Радыё Свабода».
«Пасьля таго, як у вязьніцы апынуліся Севярынец, Дашкевіч і Фінькевіч, назіральнікі мелі ўсе падставы меркаваць, што ўчорашні працэс будзе «канчатковай расправай над апазыцыйнай групай, якую ненавідзіць Лукашэнка. Калі стала вядома, што актывістам пагражае толькі штраф, прысутныя былі шакаваныя », – піша газэта.
Паводле «Wyborczej», гэта можа азначаць «пачатак гандлю з Захадам».
«Сталае пагаршэньне эканамічнай сытуацыі пасьля таго, як Расея падвысіла цэны на энэрганосьбіты, пазбаўляе Лукашэнку самаўпэўненасьці», – піша газэта.
