Абрамаўскаму «Яблоку» не хапіла грошай :: Хартыя'97 :: Навiны

Беларускае грамадскае аб’яднанне "Яблоко" у блiжэйшы час павiнна быць лiквiдавана. Аб гэтым карэспандэнту "Звязды" паведамiла кiраўнiк "Яблыка", дэпутат «палаты прадстаўнiкоў» Вольга Абрамава.

Паводле слоў палiтыка, аб’яднанне атрымала ўжо два папярэджаннi ад Мiнiстэрства юстыцыi за адсутнасць юрыдычнага адраса. "Яблоко", падкрэслiла Вольга Абрамава, адмовiўся ад арэнды памяшкання ў сталiцы некалькi гадоў таму. Прычына ў адсутнасцi сродкаў. "Я стамiлася шмат гадоў плацiць грошы. Дастаткова вялiкiя для майго сямейнага бюджэту… Грамадскае аб’яднанне не мела нiякага знешняга фiнансавання. Я i некаторыя члены Цэнтральнага савета арганiзацыi былi асноўнымi донарамi".

Пасля двух папярэджанняў палiтык дала вусную згоду Мiнiстэрству юстыцыi лiквiдаваць арганiзацыю. У блiжэйшы час, як мяркуе «дэпутат», гэта будзе зроблена рашэннем суда.

Вольга Абрамава дадала таксама, што акрамя фiнансавых праблем апошнiя гады дзейнасць "Яблока" была паралiзавана з-за адсутнасцi дзеяздольнага Цэнтральнага савета аб’яднання. Адбылося гэта пасля апошняга рэферэндуму ў Беларусi.

"Рэферэндум вельмi моцна палярызаваў настроi ў Цэнтральным савеце. Я сказала, што, нягледзячы нi на якiя абставiны, трэба працягваць удзельнiчаць у выбарах, трэба максiмальна iмкнуцца ўплываць легальнымi спосабамi на ўнутрыпалiтычную сiтуацыю. Аднак некаторыя члены Цэнтральнага савета пасля абвяшчэння рэферэндуму ў 2004-м заявiлi, што гэта ўсё бессэнсоўна, што ў парламенцкiх выбарах нiкому з нас (уключаючы мяне) удзельнiчаць няма патрэбы… Раскол прывёў да паралiчу дзейнасцi "Яблыка". Цэнтральны савет перастаў збiрацца, прымаць рашэннi i рухацца наперад. I калi дадалася фiнансавая праблема, я зразумела, што працягваць дзейнасць немагчыма".