Правакацыя расейскіх наркапаліцэйскіх. Двух грамадзян Беларусі будуць судзіць у Маскве :: Хартыя'97 :: Навiны

У панядзелак 4 чэрвеня ў Цвярскім раённым судзе адбудзецца першае судовае паседжанне па справе беларускіх грамадзян Сяргея Лагуна і Аляксея Чачурына, затрыманых супрацоўнікамі маскоўскага ўпраўлення Федэральнай службы па кантролі за абарачэннем наркотыкаў.

Карэспандэнт расейскай “Новой газеты” Вольга Баброва паведамляе: Лагун і Чачурын былі ўзятыя пад варту ў сакавіку гэтага года. Падставай для затрымання паслужыў так званы кантрольны закуп: супрацоўнікі наркапаліцыі ўгаварылі маладых людзей прывезці з Беларусі ў Маскву лекі ад кашлю, і нібыта збіраліся проста на вакзале аддаць за яго грошы.

Таблеткі ад кашлю “Туссал” у Беларусі знаходзяцца ў свабодным продажы, бо абарачэнне рэчываў, якія ў іх уваходзяць, беларускім заканадаўствам ніяк не абмяжоўваецца. “Туссал” вырабляецца ў Польшчы і свабодна прадаецца ў шматлікіх краінах Еўразвяза. Аднак рэчыва дэкстраметарфана гідрабрамід, якое ўваходзіць у склад таблетак, у Расеі прызнанае псіхатропным.

Некалькі месяцаў таму супрацоўнікі Дзяржнаркакантролю на адным з інтэрнэт-форумаў завязалі перапіску з Аляксеем Чачурыным. У сваіх лістах яны ад імя гаспадара маскоўскай аптэкі папрасілі юнака купіць і прывезці ў Маскву лекі “Туссал” – нібыта праз яго адсутнасць ў Маскве. За дастаўку лекаў у Маскву наркапаліцэйскія прапанавалі заплаціць, пры гэтым яны катэгарычна адхілілі прапанову Чачурына выслаць таблеткі поштай. Сказалі, што так яны могуць умакрэць. Калі Аляксей разам з сябрам прывезлі лекі ў Маскву, “заказчыкі”, якія выпрасілі ў хлопцаў таблеткі, прадставіліся супрацоўнікамі наркакантролю і запрасілі праехаць з імі ў аддзел. Чачурыну і Лагуну прад`яўленае абвінавачванне па 228 наркатычнаму артыкулу КК, які прадугледжвае пакаранне да 20 гадоў пазбаўлення свабоды.

Праваахоўныя органы Беларусі сур`ёзна занепакоеныя лёсам сваіх грамадзян. Генпракуратура Беларусі ўжо звярнулася з запытам у Расейскую Генпракуратуру з просьбай даць растлумачэнне, як так атрымалася, што расейскія сілавікі фактычна шляхам правакацыі ўпякаюць беларускіх грамадзян у СІЗА. З сваімі заявамі выступілі консульства Рэспублікі Беларусь і беларускі МУС. Яны таксама адзначылі, што дзеянні Лагуна і Чачурына ў Беларусі не з`яўляецца злачынствам. Наспявае дыпламатычны скандал.