ФПБ прымушае працоўных пісаць заявы з просьбай не пазбаўляць Беларусь прэферэнцый :: Хартыя'97 :: Навiны

Адміністрацыя ААТ “Палімір” жорстка цісне на сяброў пяршоўкі Беларускага незалежнага прафсаюза (БНП). Як распавёў www.praca-by.info старшыня арганізацыі Іван Святоха, пасля таго, як ён адмовіўся падпісваць прапанаваную ФПБ заяву з просьбай захаваць беларускаму ўраду гандлёвыя ільготы, адміністрацыя вырашыла ўзяцца за шэраговых сябраў.

Начальнікі цэхаў, пагражаючы непадаўжэннем кантрактаў і іншымі мерамі ўздзеяння, прымушаюць актывістаў БНП падпісваць зварот да МАП і Еўрапейскага Звязу. У заяве сказанае, што ўсё парушэнні правоў прафсаюзаў, з прычыны якіх урад пазбаўляюць ільгот, надуманыя і ніхто на прафсаюзы ніякага ціску не аказвае.

Па словах Івана Святохі, кампаніяй кіруе намеснік дырэктара па кадрах, рэжыму і выхаваўчай працы Сяргей Брыкун. Прафсаюзныя актывісты 30 траўня спецыяльна арганізавалі сход, каб абмеркаваць праблему. “Пакуль трымаюцца, – гаворыць Іван Святоха, – але не ведаю, што будзе далей, ёсць вельмі ўстойлівыя людзі, так і гавораць: “Мы на гэтай прамакатцы падпісвацца не будзем!” Але ёсць і тыя, хто баіцца. І мне, вядома, складана іх асуджаць, ва ўсіх – сем`і, дзеці. Ужо паўгода, як на нас перыядычна ціснуць. Але так адкрыта, як цяпер, яшчэ не было”.

Ян Святоха здзіўляецца, што кіраўніцтва “Паліміра” пайшло на такія дзеянні напярэдадні абмеркавання беларускага пытання на Міжнароднай канферэнцыі працы. Бо вядома, што ўступленне ў сілу рашэння Еўразвяза аб адмене гандлёвых ільгот для Беларусі шмат у чым залежыць ад таго, якое заключэнне зробіць МАП. Пасля такіх дзеянняў кіраўніцтва ААТ “Палімір” беларускаму ўраду вельмі складана будзе даказаць дэлегатам Канферэнцыі МАП, што ў краіне не існуе парушэнняў правоў прафсаюзаў.