Прэзідэнтам Ізраіля можа стаць ураджэнец Беларусі :: Хартыя'97 :: Навiны

Віцэ-прэм`ер Ізраіля Шымон Перэс, які нарадзіўся ў вёсцы Вішнёва Валожынскага раёна Менскай вобласці Беларусі, абвясціў сёння пра намер балатавацца на пасаду прэзідэнта краіны.

"Пасля працяглых роздумаў я прыняў рашэнне адгукнуцца на шматлікія просьбы і высунуць сваёй кандыдатуру", – сказаў ён, выступаючы перад паплечнікамі па кіроўнай партыі "Кадзіма". "Кадзіма" 28 траўня абвясціла пра вылучэнне 83-гадовага Перэса, былога прэм`ер-міністра і лаўрэата Нобелеўскай прэміі міра, сваім кандыдатам на прэзідэнцкіх выбарах, прызначаных на 13 чэрвеня цяперашняга года.

Мяркуецца, што канкурэнцыю Перэсу, фаварыту выбарчай кампаніі, складуць дэпутаты Кнессета Рэўвен Рывлін і Калет Авіталь, якія прадстаўляюць, адпаведна, партыі "Лікуд" і "Авода". У 2000 годзе Перэс ужо прэтэндаваў на крэсла прэзідэнта, але саступіў Мошэ Кацаву, якому сёння пагражае абвінавачванне ў некалькіх крымінальных злачынствах, уключна згвалтаванне.

Кіраўніка дзяржавы абірае Кнессет тэрмінам на сем гадоў. У Ізраілі, які з`яўляецца парламенцкай рэспублікай, прэзідэнт валодае ў асноўным прадстаўніцкімі функцыямі.

Значная частка ізраільскай палітычнай эліты родам з Беларусі. Так, першым прэзідэнтам Дзяржавы Ізраіль у 1948 годзе быў абраны выхадзец Піншчыны Хаім Вейцман. У Беларусі нарадзіліся прэм`ер-міністры Ізраіля Голда Меір, Менахем Бегін, Іцхак Шамір, Іцхак Рабін і шматлікія іншыя палітычныя дзеячы гэтай дзяржавы.