КДБ не каментуе арышт старшыні «Белнафтахіма» :: Хартыя'97 :: Навiны

Супрацоўнікі Камітэта дзяржаўнай бяспекі затрымалі ў Менску старшыню дзяржаўнага прадпрыемства “Белнафтахім” Аляксандра Бароўскага, паведаміў на прэс-канферэнцыі ў сераду генеральны пракурор Беларусі Пётр Міклашэвіч. "Па падазроне ў крадзяжы і за злоўжыванне службовым становішчам органамі Камітэта дзяржаўнай бяспекі Беларусі затрыманы кіраўнік "Бенлафтахіма" А.Бароўскі", – паведаміў генпракурор.

"Акрамя яго затрыманы яшчэ шэраг прадстаўнікоў камерцыйных структур, у якіх канфіскаваныя буйныя сумы грошай і каштоўнасці", – паведаміў генпракурор.

Ён удакладніў, што ў дачыненні іх узбуджаная крымінальная справа за злоўжыванні, крадзяжы. Цяпер затрыманыя знаходзяцца ў следчым ізалятары КДБ, паведаміў П.Міклашэвіч.

У сваю чаргу першы намеснік старшыні КДБ Беларусі Васіль Дземянцей адмовіўся паведаміць пра тое, хто затрыманы разам з А.Бароўскім.

"Тое, што сказаў генеральны пракурор, мы пакуль пакідаем без каментараў", – заявіў ён у тэлефоннай гутарцы з карэспандэнтам "Інтэрфакса".

А.Бароўскі быў прызначаны на пасаду старшыні канцэрна "Белнафтахім" пастановай урада ад 25 снежня 2005 года, замяніўшы на гэтай пасадзе Браніслава Сівога, які цяпер працуе на пасадзе начальніка ўпраўлення інвестыцый і развіцця канцэрна. Да прызначэння на пасаду кіраўніка канцэрна "Белнафтахім" А.Бароўскі узначальваў адно з найбуйнейшых беларускіх нафтахімічных прадпрыемстваў ААТ "Палімір".

Неўзабаве урад павінен прызначыць выканаўцу абавязкаў канцэрна дырэктара "Белнафтахім". На думку назіральнікаў, ім можа стаць намеснік старшыні канцэрна Міхаіл Асіпенка альбо яшчэ адзін намеснік – Уладзімір Волкаў.

Беларускі дзяржаўны канцэрн па нафце і хіміі аб`ядноўвае 50 арганізацый з агульнай колькасцю працоўных каля 120 тыс. чалавек. Прадукцыя канцэрна пастаўляецца больш як у 80 краін свету. У агульным аб`ёме прамысловай прадукцыі рэспублікі ўдзельная вага арганізацый канцэрна складае каля 35%, а ў агульнарэспубліканскім экспарце – больш за 50%.