У Кіеве адкрыты Музей савецкай акупацыі :: Хартыя'97 :: Навiны

Канферэнцыя кіеўскай арганізацыі Таварыства “Мемарыял” імя Васіля Стуса прыняла рашэнне аб надаванні статусу Музея савецкай акупацыі экспазіцыі “Забыццю не падлягае: хроніка камуністычнай інквізіцыі”.

Яшчэ 30 лістапада 2001 года ў памяшканні Кіеўскай гарадской арганізацыі Таварыства “Мемарыял” імя Стуса была адкрытая першая на постсавецкай прасторы музейная экспазіцыя “Забыццю не падлягае: хроніка камуністычнай інквізіцыі”, якая адлюстроўвае камуністычныя злачынствы перыяду акупацыі Украіны 1917–1991 гадоў.

З часу адкрыцця экспазіцыі Таварыства значна пашырыла сваю дзейнасць. Экспазіцыя з перасоўных стэндаў перарасла ў паўнавартасны музей, у якім акрамя навуковай і пазнавальнай, вядуцца навучальная і выхаваўчая праца сярод моладзі.

У музеі з`явіліся новыя экспанаты, экспазіцыі “Кіеўскі мартыралог”, “Украінскія Салаўкі”, “Моўная экспазіцыя”. Сабраная калекцыя архіўных дакументаў, сфармаваная навуковая бібліятэка, відэатэка навукова-папулярных фільмаў і іншыя матэрыялы і экспанаты, "якія выкрываюць злачынствы супраць украінскага народа ў перыяд савецкай акупацыі".

Улічваючы прапановы сябраў Таварыства, шматлікія пажаданні наведвальнікаў і рашэнні Савета Таварыства ад 10.04.2007 г., пратакол №9, удзельнікі Канферэнцыі, вырашылі даць музею пры Кіеўскай гарадской арганізацыі Таварыства “Мемарыял” імя Стуса назву Музей савецкай акупацыі Украіны.

Канферэнцыя таксама пастанавіла савету і праўленню Таварыства ажыццявіць рэгістрацыю музея з статусам грамадскага адпаведна Закону Украіны “Аб музейнай справе”.

Экспазіцыі і матэрыялы музея адкрытыя для свабоднага прагляду з 10:00 да 17:00, акрамя суботы і нядзелі, па адрасе г. Кіеў вул. Стэльмаха 6-А. Экскурсіі для арганізаваных груп можна заказаць загадзя, паведамляе Карэспандэнт.net.