Сёння – восьмая гадавая трагедыі на Нямізе :: Хартыя'97 :: Навiны

Сёння – восьмая гадавіна трагедыі ў падземным пераходзе станцыі метро "Няміга". Трагедыя адбылася 30 траўня 1999 года. У той вечар больш за дзве тысяч чалавек – у асноўным, моладзь ва ўзросце да 18 гадоў – вярталіся з свята піва пасля канцэрту, які праходзіў каля Палаца спорту. Хаваючыся ад раптоўнага дажджу і навальніцы, паток людзей накіраваўся да самай блізкай станцыі метро. Узнікла ціскатня, паніка, па людзях, якія ўпалі, праходзілі іншыя, якіх нёс некантраляваны натоўп.

Па словах відавочцаў, усё цягнулася не больш як 10 хвілін. У выніку ціскатні загінулі 54 чалавекі, прычынай смерці большасці з іх стала асфіксія. Каля ста чалавек былі шпіталяваныя з рознымі траўмамі.

Па факце здарэння была ўзбуджаная крымінальная справа, аднак вінаватых не знайшлі. Па версіі ўлад, прычынай стаў трагічны збег акалічнасцяў. Сваякі загінуўшых неаднаразова падавалі ў суды пазовы на гарадскія ўлады, міліцыю, піўзавод "Аліварыя", радыёстанцыю "Мір" і ТАА "Клас-клуб ДК", якія ў той дзень адказвалі за арганізацыю і забеспячэнне парадку на масавым мерапрыемстве – свяце піва. Аднак пазовы былі адхіленыя судамі розных інстанцый.

Менчукі памятаюць пра трагічную дату. Штогод 30 траўня да падножкі помніка, усталяванага на месцы трагедыі, прыносяцца жывыя кветкі.