Супраца з КДБ каштуе 300 тысячаў рублёў :: Хартыя'97 :: Навiны

Менавіта такую суму прадстаўнік камітэту прапанаваў рэдактару газэты "Бум" Станіславу Кавалеўскаму за інфармацыю пра магілёўскую апазыцыю.

Супраца не атрымалася, бо Кавалеўскі ацаніў сваю мяркуемую дапамогу спэцслужбам у большую суму. Ён папрасіў паўтары-дзьве тысячы даляраў у месяц і запіс у працоўнай кніжцы, паведамляе “Радыё Рацыя”.

Паводле Станіслава Кавалеўскага, размову людзі ў цывільным адразу пачалі з пагрозаў. Яны нават не прадстаўляліся, бо, напэўне, палічылі, што рэдактар газэты іх і так ведае. Затое паабяцалі, што калі Кавалеўскі не перастане актыўнічаць, яго выключаць з Магілёўскага дзяржаўнага ўнівэрсытэту, дзе вучыцца на першым курсе гістфаку. Па меркаваньні супрацоўнікаў КДБ, беларускае войска менш прэстыжнае месца, бо яны абяцалі накіраваць студэнта менавіта туды.

Станіславам Кавалеўскім КДБ цікавіцца ўжо даўно. Спачатку супорацоўнікі КДБ распавядалі, што ён у міжнародным вышуку. Потым ва ўнівэрсытэце распытвалі пра замежныя паездкі. Нарэшце яго, ня без дапамогі чэкістаў, зьнялі з пасады старасты за арганізацыю акцыі пратэсту супраць адмены льготаў. А дэкан факультэту ўжо абяцаў выгнаць яго з унівэрсытэту. Пакуль застаецца адкрытым пытаньне: ці перажыве студэнт Кавалеўскі сэсыю.