Прэзідэнтам Латвіі абраны Валдзіс Затлерс :: Хартыя'97 :: Навiны

Сейм Латвіі ў чацвер падчас таемнага галасавання абраў сёмым прэзідэнтам краіны Валдзіса Затлерса (Valdis Zatlers). За яго прагаласавалі 58 дэпутатаў, супраць – 40. За другога кандыдата Айвара Эндзіньша (Aivasu Endzins) былі пададзеныя 39 галасоў, супраць яго прагаласавалі 59 парламентарыяў. Усяго ў галасаванні ўдзельнічалі 98 парламентарыяў.

На гэтую пасаду В.Затлерса высунулі чатыры партыі кіруючай кааліцыі – Народная партыя, аб`яднанне "Айчыне і свабодзе"/ДННЛ, Латвійская першая партыя/"Латвійскі шлях" (ЛПП/ЛП) і Саюз зялёных і сялян (СЗК), паведамляе “Інтэрфакс”.

Гэта адбылося пасля таго, як гэтыя партыі не здолелі дамовіцца аб вылучэнні прапанаванага Народнай партыяй Марыса Рыексцінша (Mаris Riekstins) або кандыдата ад ЛПП/ЛП Карыны Петэрсоне (Karinа Pеtersonе).

"Айчыне і свабодзе"/ДННЛ і СЗК лічылі, што ўсім кааліцыйным партыям варта дамовіцца з нагоды аднаго – беспартыйнага ці нейтральнага – кандыдата.

Кандыдатура В.Затлерса ўпершыню абмяркоўвалася за некалькі дзён да заканчэння тэрміна афіцыйнага вылучэння кандыдатаў. Хоць В.Затлерс спачатку не пагадзіўся балатавацца, у далейшым ён сваё рашэнне змяніў.

Беспартыйны В.Затлерс нарадзіўся ў 1955 годзе, жанаты, у сям`і трое дзяцей. Скончыў Рыжскі медыцынскі інстытут, з 1994 года з`яўляецца кіраўніком Шпіталя траўматалогіі і артапедыі.

Кар`еру пачынаў як траўматолаг-артапед, пазней стаў загадчыкам аддзялення траўматалогіі Рыжскага 2 шпіталя. Валодае 15-летнім міжнародным досведам прафесійнай працы ў медыцыне.

Новы кіраўнік дзяржавы ўдзельнічаў у ліквідацыі наступстваў катастрофы на Чарнобыльскай АЭС. Уваходзіў у Народны фронт Латвіі.