Беларусь клічуць у Еўропу :: Хартыя'97 :: Навiны

У жніўні ў некалькіх дзесятках метраў ад беларускай мяжы, на тэрыторыі Літвы ля Нарвілішскага замка адбудзецца канцэрт-фэст «Be 2gether». Паводле паведамлення «Нямецкай хвалі», арганізатары мерапрыемства, сярод якіх і Міністэрства замежных спраў Літвы, не ўтойваюць, што гэты заклік адрасаваны найперш беларусам.

Канцэрт з удзелам сусветна вядомых і беларускіх гуртоў будзе праходзіць у Літве, але тэарэтычна паслухаць яго магчыма будзе з тэрыторыі Беларусі – настолькі блізка падбярэцца ідэя еўрапейскай інтэграцыі да беларускай мяжы.

Па словах сакратара літоўскага МЗС Жыгімантаса Павілёніса (Zygimantas Pavilionis), гэтае мерапрыемства прымеркаванае да 50-годдзя заснавання Еўрапейскай супольнасці, а мэта яго – паказаць, што па той бок заслоны беларусаў чакаюць:

“Мы хочам сказаць і сабе, і беларусам, і Еўропе, што фармаванне Еўропы не завершанае і павінна працягвацца. Мы хочам нагадаць пра існаванне беларускай нацыі. Для нас, дыпламатаў, падабраць для гэтага прыдатную форму і нагадаць Еўропе пра гэтую краіну не так проста, а вось такое мерапрыемства – гэта выдатная падстава”, – паведаміў Павілёніс.

“Музыка разбурае сцены” – вось лозунг канцэрту. Меркаваўся нават удзел легендарных стваральнікаў “Сцяны” Pink Floyd, аднак сарвалася. Так або інакш, паводле запэўніванняў арганізатараў, спіс і заходніх удзельнікаў, і беларускіх зорак будзе даволі вялікі і прывабны.