Улада зарабляе на апазіцыі :: Хартыя'97 :: Навiны

Апазіцыянераў у Беларусі перасталі саджаць, а пачалі караць рублём. І новая "штрафная палітыка" дзяржаве відавочна выгодная. Адседкі палітыкаў прыносілі краіне рэпутацыю "паліцэйскай дзяржавы". А пасаджаных жа яшчэ і ўтрымоўваць трэба. А тут толькі ў траўні штрафы апазіцыянераў папоўнілі казну прыкладна на пяць тысяч даляраў. Можна сказаць, апазіцыя дапамагае дзяржаве перажыць падаражанне энергарэсурсаў!

У "новай палітыкі" вялікая будучыня – напрыклад, толькі з "маладафронтаўцаў" пракурор прасіла па 7,2 тысячы даляраў штрафу (далі па 500 даляраў). Ды і "справы" не перавядуцца: цяпер, напрыклад, моладзь пратэстуе супраць зносу гістарычных будынкаў у Гародні, чакаюць суду праваабаронца Валеры Шчукін і апазіцыйны лідэр Андрэй Клімаў.

«КП в Беларуси» палічыла, хто з апазіцыянераў «дапамог» дзяржказне ў траўні:

- За "Чарнобыльскi шлях" аштрафавалі спачатку моладзь (790 даляраў), потым арганізатараў – яшчэ 1150 даляраў.

- Штраф у 290 даляраў атрымаў апазіцыйны палітык Анатоль Ляўковіч за выступ у Дзень працы.

- Чацвярых актывістаў незарэгістраванай арганізацыі "Малады Фронт" аштрафавалі на 1885 даляраў.

- Яшчэ 290 даляраў "зарабіў" юны "маладафронтавец" за распаўсюджванне ўлётак.

- 290 даляраў выплацяць двое студэнтаў, якія выступілі супраць адмены льгот.

- 145 даляраў за выраз пратэсту супраць зносу гістарычных будынкаў у Гародні.

РАЗАМ: прыкладна 4840 даляраў.