Першы прысуд за акцыю супраць адмены льгот – 5 сутак арышту :: Хартыя'97 :: Навiны

Моладзевы актывіст Павал Вінаградаў за ўдзел у студэнцкай акцыі супраць адмены льгот прысуджаны да 5 сутак арышту. Суд Цэнтральнага раёна Менска (суддзя Паўлючук Т.Е.) палічыў, што малады чалавек парушыў арт. 23.24 Кодэкса аб адміністрацыйных правапарушэннях – “парушэнне правіл правядзення масавых мерапрыемстваў”. Суды над астатнімі ўдзельнікамі акцыі працягваюцца.

Акцыя пратэсту студэнтаў супраць адмены льгот была жорстка разагнаная 1 чэрвеня ў Менску супрацоўнікамі палка міліцыі спецыяльнага прызначэння. Блізу 100 чалавек правялі ў цэнтры горада шэсце-перфоманс. Моладзевыя актывісты неслі ў руках труну, на якой было напісанае “Льготы”. Наперадзе, па ўсіх традыцыях пахавальнай працэсіі, студэнты неслі ў чорнай рамцы вялікі льготны квіток для праезду ў грамадскім транспарце.

Маладыя людзі здолелі прайсці такім чынам сотню метраў – на іх накінуліся супрацоўнікі міліцыі. Як паведамілі прэс-цэнтру Хартыі’97 відавочцы, амапаўцы дзейнічалі жорстка, валілі людзей на зямлю, выкручвалі рукі, збівалі дубінкамі і кулакамі.

Усіх затрыманых даставілі ў Цэнтральны РУУС Менска. Пяцёра актывістаў былі дастаўленыя ў спецпрыёмнік-размеркавальнік ГУУС Менгарвыканкама да суду. У 4-ым гарадскім шпіталі знаходзіцца Ілля Шуст. Пасля збівання супрацоўнікамі палка міліцыі спецыяльнага прызначэння (былы АМАП) медыкі зафіксавалі ў хлопца садно левай ныркі, садзені, падазрон на чэрапна-мазгавую траўму.