Прадстаўнік АБСЕ крытыкуе сітуацыю з свабодай слова ў Беларусі :: Хартыя'97 :: Навiны

Сітуацыя з свабодай СМІ ў Беларусі не змянілася. Пра гэта заявіў прадстаўнік АБСЕ па свабодзе СМІ Міклаш Харашці 4 чэрвеня на сустрэчы з журналістамі ў Менску. Ён падкрэсліў, што ў Беларусі існуе "амаль поўная манаполія дзяржавы на друк і распаўсюджванне газет, а тэлебачанне знаходзіцца цалкам пад дзяржаўным кантролем".

Ён адзначыў, што ў папярэднім дакладзе, у 2005 годзе, АБСЕ змушаная была канстатаваць нязменнае паніжэнне колькасці незалежных сродкаў масавай інфармацыі ў Беларусі. Па словах М.Харашці, гэта з`явілася вынікам прававых і адміністрацыйных мераў у беларускім заканадаўстве, якія былі накіраваныя на стварэнне такой сітуацыі, паведамляе БелаПАН.

На думку Харашці, закон аб СМІ выкарыстоўваецца "не па прызначэнні". "Ён абмяжоўвае дзейнасць СМІ і ўжываецца як сродак пакарання. Увесь час выкарыстоўваюцца метады рэгістрацыі і перарэгістрацыі ў рамках дадзенага закона", – падкрэсліў прадстаўнік АБСЕ. Ён адзначыў, што асноўная частка незалежнай прэсы нязменна сутыкаецца як з праблемамі друку і распаўсюджвання на тэрыторыі Беларусі, так і з праблемай рэгістрацыі юрыдычных адрасоў.

Харашці паведаміў, што 4 чэрвеня плануе сустрэцца з старшынёй камісіі “палаты прадстаўнікоў” па правах чалавека, нацыянальных стасунках і сродках масавай інфармацыі Юрыем Кулакоўскім для абмеркавання законапраекта аб інфарматызацыі. Ён адзначыў, што АБСЕ падрыхтавала свае каментары да дадзенага праекту. Па словах М.Харашці, законапраект носіць "абмежавальны і прадпісваючы характар". Абмежавальны ў плане ўтрымання і прадпісваючы ў плане рэгістрацыі. "Абмежавальны і прадпісваючы характар з`яўляецца сэнсам гэтага закона", – дадаў прадстаўнік АБСЕ.

Міклаш Харашці выказаў надзею, што ў беларускім заканадаўстве адбудуцца пазітыўныя змены і будуць ліквідаваныя бар`еры, якія абмяжоўваюць свабоду СМІ.