Афіцыйны Менск таргуецца з Еўропай :: Хартыя'97 :: Навiны

Як стала вядома сайту Хартыі’97, 8 чэрвеня плануецца візіт намесніка міністра замежных спраў Беларусі Валерыя Варанецкага ў Брусэль, падчас якога павінны адбыцца яго сустрэчы з Хельгай Шмідт, прадстаўніком кабінета Вярхоўнага камісара ЕЗ Хаўера Саланы, і службоўцамі Еўрапейскай Камісіі. Запланаванае, што падчас сустрэчы будуць абмяркоўвацца магчымасці паляпшэння стасункаў паміж афіцыйным Менскам і ЕЗ, здыманне абмежаванняў на кантакты з беларускімі службоўцамі, адкрыццё прадстаўніцтва ЕЗ у Менску і іншыя пытанні ўзаемаадносін беларускіх улад з Еўропай.

“Прамая сустрэча службоўцаў Еўразвяза з прадстаўніком афіцыйнага Менска Варанецкім, на мой погляд, заўчасная. Раней гаворка ішла пра тое, што такі візіт можа адбыцца пасля пэўных крокаў беларускіх улад па дэмакратызацыі палітычнай сітуацыі ў краіне для таго, каб быў прадмет для сур`ёзнай гутаркі, аднак пэўных крокаў мы пакуль не ўбачылі. Насупраць, працягваюцца арышты падчас мірных пратэстаў беларускіх дэмакратычных актывістаў, ператрусы ў іх кватэрах. Патрабаванні Еўразвяза аб вызваленні ўсіх палітвязняў і спыненні палітычных рэпрэсій таксама не выкананыя”, – каментуе прэс-цэнтру Хартыі’97 сітуацыю міжнародны каардынатар Хартыі’97, былы намеснік міністра замежных спраў Беларусі Андрэй Саннікаў.

На думку Саннікава, прадстаўнік афіцыйнага Менска, верагодней за ўсяго, паспрабуе выкарыстаць сітуацыю з палітвязнямі для гандлю з Еўразвязам.

“Маўляў, мы выпусцілі Севярынца і Статкевіча, а цяпер вы павінны пайсці на нейкія саступкі па пытаннях, якія нас цікавяць. Такія спробы павінны рашуча спыняцца еўрапейскімі дзяржавамі. Спадзяюся, прадстаўнікі ЕЗ патлумачаць гэта пры сустрэчы з Варанецкім. Хутчэй за ўсё, намесніку міністра даручаная місія дамагчыся адмены рашэння па выключэнні Беларусі з Агульнай сістэмы прэферэнцый, аднак на фоне пазбаўлення незалежных прафсаюзаў правоў і з`яўлення падкінутых лістоў, арганізаваным ФПБ, гэта выглядае вельмі дзіўна”, – адзначыў Саннікаў.

Былы намеснік міністра замежных спраў адзначае, што “беларускія ўлады настойліва спрабуюць навязваць свае правілы, замест таго, каб прызнаць агульнапрынятыя стандарты ў галіне правоў чалавека і дэмакратыі”.

“Акрамя паездкі Варанецкага я б яшчэ адзначыў прыезд прадстаўніка АБСЕ па свабодзе СМІ Міклаша Харашці ў Менск. Абодва гэтыя візіты знаходзіліся ў пакеце прапаноў афіцыйнага Менска еўрапейскім структурам. Харашці падчас свайго візіту зафіксаваў пагаршэнне сітуацыі з свабодай СМІ ў Беларусі, узяў удзел у няўцямным семінары, сустрэўся з журналістамі і прадстаўнікамі “палаткі”. Такія візіты нельга назваць дзейснымі. Калі міжнародныя арганізацыі робяць крокі на сустрэчу афіцыйнаму Менску з ініцыятывы беларускіх улад, то гэтыя крокі павінны быць напоўненыя вялікім сэнсам, а не сімвалічнымі дзеяннямі, якія дазваляюць беларускаму рэжыму казаць пра паляпшэнне стасункаў з Еўропай і пры гэтым трымаць у турмах палітвязняў”, – заявіў Андрэй Саннікаў.