У Еўракамісіі даведаліся пра несумленнасць Козіка :: Хартыя'97 :: Навiны

Арганізаваная Федэрацыяй прафсаюзаў Беларусі масавае рассыланне лістоў у адрас еўрапейскіх структур з просьбай не адмяняць гандлёвыя льготы і з запэўненнямі, што ў Беларусі няма парушэнняў правоў прафсаюзаў, а таксама скандал з падробленымі пад заявамі Федэрацыі подпісамі лідэраў замежных арганізацый сталі вядомыя вышэйшым службоўцам Еўрапейскай Камісіі, паведамляе www.praca-by.info. Генеральны сакратар Еўрапейскай канфедэрацыі прафсаюзаў Джон Монкс і генеральны сакратар Міжнароднай канфедэрацыі прафсаюзаў Гай Райдэр паведамілі пра гэтыя факты камісару па гандлі Еўрапейскай Камісіі Пітэру Мандэльсону.

Лідэры найбуйнейшых міжнародных прафсаюзных аб`яднанняў не сумняваюцца, што “Урад сур`ёзна спадзяецца такім чынам упэўніць Міжнародную канферэнцыю працы падтрымаць яго пазіцыю і дамагчыся, каб МАП паінфармавала Еўразвяз пра тое, што сітуацыя ў Беларусі палепшылася і таму рашэнне ЕЗ павінна быць скасаванае”.

У сувязі з гэтым Джон Монкс і Гай Райдэр хочуць папярэдзіць прадстаўнікоў урадаў краін-сябраў ЕЗ, “сярод якіх не ўсе ўсведамляюць да канца, што гэты прафсаюзны зварот не сапраўдны”, “пра факт падробкі ў заяве ФПБ”.

“Было б карысна паказаць крайнасці, да якіх урад Лукашэнка, як відаць, гатовы дайсці для таго, каб не дапусціць прыняцця рашэння аб АСП”, – лічаць лідэры ЕКП і МКП. Далей у сваім звароце яны адзначаюць, што “ў заяве незалежнага прафцэнтра БКДП ясна гаворыцца пра тое, што, замест таго, каб забяспечваць захаванне правоў і свабодаў прафсаюзаў у Беларусі, урад Лукашэнкі марнуе сваю энергію і спрабуе ўздзейнічаць на міжнародную супольнасць”.