Выстава Міколы Купавы ў Нью-Ёрку :: Хартыя'97 :: Навiны

3 чэрвеня, у грамадскай залі Сабору Сьвятога Кірылы Тураўскага, Беларускі Музэй у Нью-Ёрку адчыніў пэрсанальную выставу знакамітага беларускага мастака Міколы Купавы. Перад наведавальнікамі выставы выступіў лідэр Кансерватыўна-Хрысціянскай партыі БНФ Зянон Пазьняк і кіраўнік Беларускага Інстытута Навукі і Мастацтва Вітаўт Кіпель. Яны распавялі пра гісторыю разьвіцця беларускага мастацтва, як на Беларусі, так і на эміграцыі, павіншавалі мастака з адкрыцьцем выставы. Мікола Купава азнаёміў прысутных з прадстаўленымі працамі. Ад імя беларусаў Нью-Ёрку мастака прывітаў спадар Мікалай Сагановіч. Афіцыйную частку адкрыцьця скончыў спадар Сяржук Сокалаў-Воюш, які таксама павіншаваў мастака і праспяваў адраджэнскую песьню.

Мікола Купава - мастак беларускай нацыянальнай тэматыкі. У сваёй шматграннай творчасьці мастак увасабляе самыя яркія, значныя постаці беларускай гісторыі і культуры. Ягонаму пэндзлю і разцу належаць такія вобразы як Вялікі полацкі князь Усяслаў Чарадзей, княгіня Рагнеда і князь Ізяслаў, Ефрасіньня Полацкая і Кірыла Тураўскі. Асобнае месца ў творчасьці М. Купавы займае распачатая серыя Вялікія князі ВКЛ, беларускія палкаводцы, а таксама дзьве вялікія нізкі "За волю, роўнасьць, незалежнасьць!" - прысьвечаныя паўстаньню пад кіраўніцтвам Андрэя Тадэвуша Касьцюшкі - нацыянальнага героя ЗША, Польшчы і Беларусі, і графічная серыя ``Cейбіты вечнага" - прысьвечаная паўстаньню 1863-1864 гг. пад кіраўніцтвам Кастуся Каліноўскага. Але надзвычайнае месца ў творчасьці мастака займае тэма Янкі Купалы і Якуба Коласа - вялікіх Беларускіх песьняроў. Над гэтымі творамі майстар працуе, пачынаючы ад 1980 года. У выніку зьявіліся партрэты паэтаў, крыявіды іх родных мясьцінаў: Вільня, Менск, Пінск ды ілюстрацыі да іх твораў. Усе працы ў мастака аб`яднаныя беларускай нацыянальнай ідэяй. Гэта акалічнасьць абавязвае творцу актыўна шукаць і выразную беларускую форму выяўленьня.

На выставе акрамя заяўленых тэмаў, прысьвечаных юбілею двух вялікіх песьняроў зямлі беларускай, дэманструюцца працы, у якіх паказаны вобразы беларускіх асьветнікаў Ефрасіньні Полацкай, Кірылы Тураўскага, Францішка Скарыны, гістарычных асобаў Беларусі - Літвы - Крывіі.

Мастак дасканала валодае тэхнікай лінарыту і каляровай аўталітаграфіі, акварэлі і алейнага жывапісу. Выстава "Постаці зямлі Беларускай" першая ў сваім родзе культурная акцыя, прысьвечаная юбілею Янкі Купалы і Якуба Коласа, якая распачала сваю дзейнасьць на амерыканскім кантынэнце.

За ўвесь час Мікола Купава браў удзел болей як у 70 нацыянальных, персанальных і міжнародных выставах. Творы мастака захоўваюцца ў Нацыянальным мастацкім музеі Беларусі, у Дзяржаўным музеі Вялікай Айчыннай вайны Беларусі, у Дзяржаўным літаратурным музеі Максіма Багдановіча, у Дзяржаўным літаратурным музеі Янкі Купалы, у Дзяржаўным літаратурна-мемарыяльным музеі Якуба Коласа, у Мінскім абласным музеі ў Маладзечна, у Музеі гісторыі і культуры Аршаншчыны, у Музеі-запаведніку “Заслаўе”.

Выстава Міколы Купавы гэта ужо другая выстава якая праводзіцца Беларускім Музэям у Нью Ёрку. Ад імя адміністнрацыі музэя і царкоўнай рады якая прадастваіла памяшканьне мы запрашаем усіх наведаць выставу у грамадскай залі Сабору Сьвятога Кірылы Тураўскага якая працягніцца да Ліпеня.