Эўрапейскі Марш у працяг Маршаў Свабоды :: Хартыя'97 :: Навiны

Каардынацыйны камітэт Эўрапейскай кааліцыі абмеркаваў пляны бліжэйшых дзеяньняў. Прынятае рашэньне выступіць зь ініцыятываю стварэньня грамадзянскага альянсу «За эўрапейскую будучыню Беларусі». А таксама правесьці Эўрапейскі Марш у восень гэтага году.

Пра пляны й дзейнасьць Эўрапейскай кааліцыі Польскаму радыё расказавае адзін з каардынатараў Уладзімер Навасяд.

-- Ідэя правядзеньня Эўрапейскага Маршу належыць Хартыі’97. Мы падтрымалі іх ініцыятыву. Гэта працяг працы Эўрапейскай кааліцыі, якая была створаная два гады таму паводле ініцыятывы Міколы Статкевіча. Павел Севярынец таксама зьяўляецца сябрам Эўрапейскай кааліцыі. Калі ён атрымаў турэмны тэрмін, я быў каардынатарам. Цяпер мы працуем разам і разам прымаем рашэньні. У нас няма ні першых, ні другасных асобаў у кааліцыі. Мы працавалі як маглі, напрыклад, на Кангрэсе ўтварылі фракцыю. Пасьля таго, як выйшлі зь няволі Статкевіч і Севярынец, працягваем працу. Мы прапанавалі Аляксандру Мілінкевічу ўзначаліць грамадзянскі альянс, грамадзянскі рух, каб Беларусь мела эўрапейскую пэрспэктыву.

Пра падтрымку ідэі Эўрапейскага Маршу ўжо заявіў лідэр партыі БНФ Вінцук Вячорка, які выказаў меркаваньне, што Эўрапейскі Марш паяднае дэмакратычныя сілы ў дзеяньні.

Якая ідэя Эўрапейскага Маршу? Адказвае кардынатар Эўрапейскай кааліцыі Мікола Статкевіч:

-- Гэта павінна быць візуальная праява волі беларускага народу да эўрапейскай будучыні. Мы хацелі, каб марш адбыўся 17 кастрычніка, бо менавіта ў гэты дзень у 1999 годзе адбыўся «Марш Свабоды». Тады ўпершыню ўдзельнікі дэманстрацыі далі адпор службам рэжыму. Гэты марш быў пераломным у вулічнай вайне за незалежнасьць у другой палове 90-х. Пасьля гэтага спыніліся выкраданьні палітыкаў. Але Эўрапейскі Марш можа быць сёлета не абавязкова 17 кастрычніка, бо гэта не выходны дзень, а трэба, каб маглі ўдзельнічаць і людзі з рэгіёнаў.

А чаму марш цяпер называецца Эўрапейскі Марш? “Таму што эўпрапейскі выбар больш шырокае паняцьце. Гэта і свабода, і дэмакратыя, і эўрапейскія каштоўнасьці”, -- лічыць Мікола Статкевіч.

Паводле інфармацыі Хартыі’97, «Марш Свабоды» 17 кастрычніка 1999 году ў Менску сабраў 25 тысячаў удзельнікаў. На «Марш Свабоды-2» 15 сакавіка 2000 году прыйшло ўжо 40 тысячаў чалавек.