Праз праблемы на Мазырскім НПЗ Гомельская вобласць засталася без сродкаў :: Хартыя'97 :: Навiны

Фінансавыя праблемы беларускага ААТ "Мазырскі нафтаперапрацоўчы завод" стварылі праблемы з напаўненнем бюджэту Гомельскай вобласці, паведамляецца на сайце BelSwissBank.

Крыніца, блізкая да органаў дзяржупраўлення адзначыла, што Мазырскі НПЗ быў асноўным фінансавым донарам абласнога бюджэту – палову бюджэтных адлічэнняў НПЗ накіроўваў у рэспубліканскі бюджэт, а палову – у абласны і гарадскі. "Сёлета сітуацыя карэнным чынам памянялася з прычыны складанай фінансавай сітуацыі, якую перажывае Мазырскі НПЗ. Фактычна горад і вобласць засталіся без сродкаў – Гомельская вобласць ператварылася ў датацыйную", – сказаў суразмоўца.

Па выніках працы ў першым квартале 2007 г Мазырскі НПЗ атрымаў прыбытак у памеры 2,5 млн дал. А па выніках працы ў красавіку прадпрыемства мела страты ў памеры 5 млн дал. Гэта звязанае з ростам цэнаў на імпартуемую нафту, а таксама з тым, што з сакавіка ў 8 разоў – да 3 млн даляраў у месяц – павялічыліся адлічэнні ў інавацыйны фонд канцэрна «Белнафтахім». Акрамя таго, завод пастаўляе на «Палімір» прадукцыю нафтаперапрацоўкі ў 2 разу ніжэйшую за сабекошт. Стратным застаецца ўнутраны рынак на кожнай тоне завод губляе каля 80 даляраў, а экспартныя пастаўкі нафтапрадуктаў не дазваляюць пакрыць страты.