Праваабаронцу Валерыя Шчукіна судзяць за праўду :: Хартыя'97 :: Навiны

Сёння, 6 чэрвеня, у 14:30 у Першамайскім судзе Віцебска пачынаецца працэс над Валерыем Шчукіным. 65-гадоваму праваабаронцу інкрымінуюць артыкул 189 Крымінальнага кодэкса, абвінавачваючы ў абразе сябраў і працаўнікоў апарата выбарчых камісій падчас кампаніі па выбарах дэпутатаў мясцовых Саветаў 25-га склікання.

Праваабаронцу вінавацяць у абразе старшыні акруговай камісіі Алы Калеснік; намесніка старшыні акруговай камісіі Таццяны Укражэнкі; сябра акруговай камісіі Надзеі Агеевай; сябра апарата абласной камісіі Таццяны Буевіч.

Пасля выбараў у мясцовыя Саветы, якія прайшлі ў Беларусі 14 студзеня 2007 года, праваабаронца распаўсюджваў улёткі, у якіх паведамлялася, што сябры выбаркамаў удзельнічалі ў фальсіфікацыях вынікаў выбараў.

Характэрна, што сябры выбаркамаў не падавалі заяву з патрабаваннем узбудзіць супраць праваабаронцы крымінальную справу за «абразу». Крымінальную справу ўзбудзілі пракуроры Чыгуначнага і Першамайскага раёнаў Віцебска.

Па словах Шчукіна, пракуроры не мелі права ўзбуджаць крымінальную справу. “Па гэтым артыкуле абавязковая наяўнасць заявы ад «абражанай» асобы”, – лічыць праваабаронца.

З заявамі пратэсту супраць пераследу Валерыя Шчукіна выступілі праваабаронцы. Беларускі Хельсінкскі Камітэт лічыць абвінавачванне, прад`яўленае Валерыю Шчукіну, палітычна матываваным і заклікае выбаршчыкаў і неабыякавых грамадзян падтрымаць праваабаронцу.

Фота ByMedia.net