Акцыі «Белтрансгаза» перайшлі ва ўласнасць «Газпрома» :: Хартыя'97 :: Навiны

Сёння 12,5% акцый ААТ "Белтрансгаз" паступіла ва ўласнасць ААТ "Газпром". Пра гэта паведамілі карэспандэнту БелТА ў Дзяржаўным камітэце па маёмасці Беларусі.

Такім чынам, згодна з дамовай куплі-продажу акцый ад 18 траўня 2007 года акцыі ААТ "Белтрансгаз" у колькасці 28 661 024 штук, што складае 12,5% статутнага фонду акцыянернага таварыства, 6 чэрвеня 2007 года перададзеныя ва ўласнасць ААТ "Газпром" шляхам пераводу іх Рэспубліканскім цэнтральным дэпазітарам каштоўных папер з рахунку "ДЭПО" Дзяржаўнага камітэта па маёмасці Беларусі на рахунак "ДЭПО" ААТ "Газпром" у дэпазітары ААТ "Белгазпромбанк".

У Дзяржкаммаёмасці таксама адзначылі, што абодва бакі зацікаўленыя ў паспяховай працы створанай газатранспартнай арганізацыі. Таму працэс пераводу грошай і перадача акцый ажыццёўленыя раней усталяванага дамовай тэрміна.

Нагадаем, што ААТ "Газпром" 4 чэрвеня перавёў у Беларусь $625 млн. за куплю 12,5% акцый ААТ "Белтрансгаз". Грошы паступілі ў рэспубліканскі бюджэт у Дзяржаўны мэтавы бюджэтны фонд нацыянальнага развіцця Рэспублікі Беларусь.

Па даручэнні кіраўніка дзяржавы ў мэтах стварэння сумеснай беларуска-расейскай газатранспартнай арганізацыі Дзяржаўным камітэтам па маёмасці і ААТ "Газпром" 18 траўня 2007 года складзеная дамова куплі-продажу 50-працэнтнага пакета акцый ААТ "Белтрансгаз" па цане $2,5 млрд. Прадугледжваецца, што на працягу 2007-2010 гадоў ААТ "Газпром" штогод будзе аплачваць па $625 млн. за пакет акцый у памеры 12,5%.

ААТ "Белтрансгаз" гарантуе газазабеспячэнне і транспартоўку газу па тэрыторыі Беларусі. Прадпрыемства эксплуатуе каля 7 тыс.км газаправодаў пярокругам ад 100 да 1400 мм, а таксама абслугоўвае беларускі ўчастак магістральнага газаправода "Ямал-Еўропа", які належыць ААТ "Газпром".