Рэнтабельныя заводы прымусяць дзяліцца прыбыткам з Лукашэнкам :: Хартыя'97 :: Навiны

134 высокапрыбытковых прадпрыемствы пералічаць у дзяржаўны мэтавы бюджэтны фонд нацыянальнага развіцця звыш 97 млрд. рублёў. Дадзенае рашэнне змешчанае ў пастанове Савета міністраў № 692 ад 29 траўня 2007 года, апублікаванай на Нацыянальным прававым інтэрнэт-партале. Сродкамі гэтага фонду распараджаецца Аляксандр Лукашэнка.

Прадпрыемствы пералічваюць частку прыбытку па выніках працы за 2006 год роўнымі часткамі штомесяц.

Сярод буйных донараў фонду: ААТ "Белшына" – 30 млрд. рублёў, РУП "ПА "Беларуснафта" – 56 млрд. 723 млн. рублёў, ААТ "Крыніца" – 2 млрд. 183 млн. рублёў, РПУП "Белцветмет" – 729 млн. рублёў, РУП "Белаэронавигация" – 898 млн. рублёў, РУПП "Минсквторчермет" – 675 млн.

Паводле пастановы паніжаны ўнёсак у 2006 годзе РУП "ПА "Беларуснафта" з 257 млрд. да 11 млрд. 610 млн. рублёў, і ТАА "Мазырскі нафтаперапрацоўчы завод плюс" з 65 млрд. да 3,2 млн. рублёў.

Як паведамлялася раней, у дзяржаўны мэтавы фонд нацыянальнага развіцця з дадатковых крыніц таксама будуць пералічаныя звыш 61 млрд. рублёў паводле ўказу прэзідэнта № 242 ад 29 траўня 2007 года.

Нагадаем, што паводле пастановы Савета міністраў № 674 ад 29 траўня 2006 года, 37 прадпрыемстваў, сярод якіх дзяржаўныя ўнітарныя прадпрыемствы і ААТ з доляй дзяржавы, у 2006 годзе пералічылі ў фонд нацыянальнага развіцця ад прыбытку (звышпрыбыткі), атрыманага па выніках працы ў 2005 годзе, 61 млрд. 894 млн. рублёў. Найбольшыя сумы пералічылі ААТ "Нафтан" – 23 млрд. 585 млн. рублёў, РУП "Беларуськалій" – 13 млрд. 679 млн. рублёў, РУП "Гомельтранснафта "Дружба" – 7 млрд. 227 млн. рублёў. Сярод буйных донараў фонду – РПУП "Белцветмет", РУПП "Витебсквтормет", ТПРУП "Белфармация".

Дзяржаўны мэтавы бюджэтны фонд нацыянальнага развіцця заснаваны прэзідэнтам у 2005 годзе для павелічэння прыбыткаў рэспубліканскага бюджэту, стварэння фінансавай базы для рэалізацыі "найважнейшых сацыяльных і эканамічных праектаў і праграм дзяржавы".