З Беларусі дэпартаваны пратэстанцкі прапаведнік :: Хартыя'97 :: Навiны

Увечары 6 чэрвеня з Беларусі дэпартаваны пратэстанцкі прапаведнік, грамадзянін Польшчы Яраслаў Лукасік. Ён адправіўся цягніком "Менск – Варшава" ў 20.40. На чыгуначным вакзале сталіцы святара праводзілі больш за 100 чалавек, у тым ліку пастары пратэстанцкіх цэркваў, вернікі і сябры Я.Лукасіка. Калі цягнік адправіўся, прысутныя выканалі гімн "Магутны Божа" і праскандавалі "Жыве Беларусь!".

У інтэрв`ю БелаПАН Я.Лукасік адзначыў, што цягам усіх 14 гадоў служэння ў Беларусі ў яго і царквы "Ян Прадвеснік" Аб`яднанай царквы хрысціян веры евангельскай у Рэспубліцы Беларусь "заўсёды былі вельмі добрыя стасункі з шматлікімі пастарамі і біскупамі розных пратэстанцкіх дэнамінацый хрысціянства". "Я вельмі ганаруся дружбай з гэтымі людзьмі і адчуваю іх вялізную падтрымку ў апошнія, цяжкія для мяне дні. Штодня мне прыходзілі паведамленні на мабільны тэлефон і па электроннай пошце, дзесяткі вернікаў і святароў тэлефанавалі мне па тэлефоне, выказвалі салідарнасць са мной зборам подпісаў пад зваротамі да ўлад. Магутнай праявай падтрымкі была і малітва 3 чэрвеня ў Менску, на якую сабраліся каля пяці тысяч вернікаў з розных гарадоў краіны", – сказаў Я.Лукасік.

Перад пасадкай на цягнік пастар выказаў упэўненасць у працягу сумеснай працы, каб "зямля Беларусі была хрысціянскай, свабоднай і шчаслівай".

Я.Лукасік быў духоўнікам шматлікіх беларускіх палітыкаў, навукоўцаў і дзеячаў культуры. У Беларусі застаюцца яго жонка і трое дзяцей. Калі жонцы прапаведніка судовым шляхам не атрымаецца дамагчыся адмены дэпартацыі Я.Лукасіка, яго сям`я ўз`яднаецца ў Польшчы.

30 траўня начальнік УУС Цэнтральнага раёна Менска Віталь Сінякоў аштрафаваў Я.Лукасіка на адну базавую велічыню (31 тыс. рублёў) і абвясціў пра яго дэпартацыю і забарону на ўезд у Беларусь цягам пяці гадоў. 27 траўня Я.Лукасік быў затрыманы пасля набажэнства, якое праводзілася ў прыватным доме пастара адной з пратэстанцкіх цэркваў сталіцы.

У інтэрв`ю БелаПАН моладзевы актывіст Барыс Гарэцкі назваў Я.Лукасіка "ідэалам справядлівага чалавека", які разам з Паўлам Севярынцам сыграў галоўную ролю ў яго станаўленні як хрысціяніна і патрыёта. Па словах сустаршыні аргкамітэта партыі "Беларуская хрысціянская дэмакратыя" Аляксея Шэіна, у апошнія пяць гадоў Я.Лукасік быў самым уплывовым пратэстанцкім пастарам у Беларусі. "Яго ідэі па адраджэнні нацыянальнай спадчыны сярод беларускіх пратэстантаў кардынальна змянілі хрысціянскую супольнасць краіны", – адзначыў палітык.