Музыка руйнуе сцены :: Хартыя'97 :: Навiны

Нягледзячы на асцярогі літоўскіх і беларускіх службоўцаў, рок-фэст "Be2gether" ("Будзем разам") на тэрыторыі Нарвілішскага замку (што на мяжы з Беларуссю), як і было запланавана, пройдзе ў канцы жніўня. Праблемы, якія могуць паўстаць у сувязі з аховай удзельнікаў мерапрыемства, былі абмеркаваныя 30 мая на паседжанні камітэту па міжнародных справах пры Сейме, у якім прымаў удзел міністр унутраных справаў Раймундас Шукіс.

"Раней мы дамовіліся аб правядзенні дадзенага мерапрыемства, але зараз паўстала іншая праблема, якая ляжыць у кампетэнцыі выканаўчай улады, - ахова прымежнай зоны, на якой на працягу 3-х сутак будзе знаходзіцца 10 тысяч чалавек, але гэта тэхнічная праблема, якую павінны будуць вырашыць памежныя службы, мы будзе інфармаваць аб гэтым беларускі бок", - сказаў пасля паседжання прадстаўнік камітэту Юсцінас Каросас.

Міністр унутраных справаў пасля паседжання камітэту сітуацыю не каментаваў.

СМІ раней паведамлялі, што над запланаваным канцэртам на мяжы з Беларуссю навісла пагроза, калі правядзенню мерапрыемства запрацівіўся Мінск; літоўскія палітыкі вышэйшага рангу вырашылі ўлічыць яго меркаванне.

Як пісала газета "Летувас Рутас", міністр унутраных справаў Р. Шукіс выказаў сумненне, ці будзе гарантаваная бяспека ўдзельнікам фэсту, ці будзе выконвацца рэжым прымежнай зоны, правілы правапарадку.

У канцы жніўня запланаваны фэст павінен прайсці ў Шалчынскім раёне на землях Нарвілішскага замку. На плошчы прыкладна ў 50 га на працягу 3-х дзён будуць выступаць каля 20-і вядомых выканаўцаў з ЗША, Заходняй Еўропы, Расіі, Беларусі, Літвы. Плануецца, што канцэрт наведае 15-20 тысяч чалавек.

Гэтую ідэю падтрымлівае камітэт па замежных справах пры Сейме, Урад, Еўрапейская камісія, якая дапамагае матэрыяльна. Фінансавую дапамогу таксама аказваюць літоўскія дзяржаўныя інстытуты.

Адмысловая ўвага арганізатараў свята - да гасцей з Беларусі. Літоўскі бок клапоціцца аб тым, каб у святкванні прынялі ўдзел як мага больш беларусаў, якім прыйдзецца набываць візы. Для іх плануецца продаж квіткоў па нізкіх коштах.

Напэўна, менавіта гэта не спадабалася аўтарытарнаму рэжыму, якім кіруюць беларускія ўлады, а таксама лозунг фэсту - "Музыка руйнуе сцены".

Пераклад з lrytas.lt veselovsky