ФПБ зняславілася на ўвесь свет :: Хартыя'97 :: Навiны

Генеральныя сакратары Міжнароднай канфедэрацыі прафсаюзаў (МКП) і Еўрапейскай канфедэрацыі прафсаюзаў (ЕКП) Гай Райдэр і Джон Монкс абвінавацілі Федэрацыю прафсаюзаў Беларусі (ФПБ) у фальсіфікацыі подпісаў пад зваротамі прафсаюзных арганізацый да Еўразвяза і Міжнароднай арганізацыі працы (МАП). Пра гэта гаворыцца ў сумесным лісце Г.Райдэра і Дж.Монкса да камісара па гандлі Еўразвяза Пітэра Мандэльсона. Копію ліста БелаПАН перадаў старэйшы дарадца генеральнага сакратара ЕКП Том Джэнкінс.

Аўтары ліста інфармуюць, што ў траўні 2007 года "падкантрольная ўраду Лукашэнкі ФПБ" заклікала прафсаюзы ўсіх краін выказаць пратэст супраць рашэння Савета ЕЗ аб адмене гандлёвых прэферэнцый для Беларусі ў сувязі з грубымі парушэннямі правоў незалежных беларускіх прафсаюзаў і падпісаць адпаведны зварот. "Урад такім чынам спадзяецца ўпэўніць МАП паінфармаваць ЕЗ, што сітуацыя ў Беларусі палепшылася і рашэнне неабходна адмяніць", – гаворыцца ў лісце.

У канцы траўня ФПБ паведаміла, што гэты зварот федэрацыі падтрымалі прафцэнтры 16 дзяржаў, у тым ліку Міжнароднае аб`яднанне прафсаюзаў металістаў (яно аб`ядноўвае галіновыя прафсаюзы Расеі, Беларусі, Украіны, Казахстана, Малдовы, Арменіі, Азербайджана і Грузіі). Аднак гэтую інфармацыю аспрэчыў старшыня Міжнароднага аб’яднання прафсаюзаў металістаў Мікалай Шатохін. ФПБ, у сваю чаргу, растлумачыла тое, што адбылося, "тэхнічнай памылкай".

"Мы інфармуем вас пра тое, што адбываецца, каб вы былі папярэджаныя пра махлярства ФПБ, асабліва ўлічваючы той факт, што вы кантактуеце з дзяржавамі, шматлікія з якіх не разумеюць, што дадзены зварот не з`яўляецца сапраўдным, – гаворыцца ў лісце Г.Райдэра і Дж.Монкса да еўракамісара. – Вам таксама карысна будзе ацаніць тое, як далёка гатоў пайсці ўрад Лукашэнкі ў пазбяганне адмены гандлёвых прэферэнцый".

Як паведаміў БелаПАН Т.Джэнкінс, 29 траўня ў Еўракамісію было перададзенае заключэнне Адміністрацыйнай рады МАП па Беларусі. "Еўракамісія выявіла, што Беларусь усё яшчэ не выконвае сваіх абавязальніцтваў як сябра МАП і няма ніякага прагрэсу ў сферы павагі правоў прафсаюзаў. Таму няма ніякіх падстаў для адмены рашэння па выключэнні Беларусі з Генеральнай сістэмы прэферэнцый", – адзначыў Т.Джэнкінс.

У ФПБ ліст Г.Райдэра і Дж.Монкса БелаПАН пакуль не каментуюць.