Прадпрыемствам канцэрна «Беллегпром» уразаюць ільготы :: Хартыя'97 :: Навiны

Пяць прадпрыемстваў канцэрна "Беллегпром" з першага ліпеня гэтага года павінны быць пазбаўленыя льгот, прэферэнцый і іншых мер дзяржаўнай падтрымкі згодна з палажэннямі беларуска-расейскага міжурадавага пагаднення па стварэнні роўных умоў узаемнага гандлю, паведаміў у чацвер на прэс-канферэнцыі ў Менску намеснік старшыні канцэрна "Беллегпром" Анатоль Гураў.

"У лёгкай прамысловасці Беларусі толькі 5 прадпрыемстваў маюць ільготы ад дзяржавы і карыстаюцца дзяржаўнай падтрымкай. Гэта – Баранавіцкі і Аршанскі ільнокамбінаты, прадпрыемства "Гранітэкс", ААТ "Алеся" і кампанія "КІМ", – сказаў А.Гураў, удакладніўшы, што гэтым прадпрыемствам дзяржавай прадстаўленая адтэрміноўка па плацяжах у рэспубліканскі бюджэт. "Гэтыя даўгі ім не даруюцца, запазычанасць будзе вернутая ў бюджэт у поўным аб`ёме згодна з заканадаўствам, працягнуў намеснік старшыні канцэрна, паведамляе “Інтэрфакс”.

Ён удакладніў, што страты ў цэлым па галіне ў выніку адмены мер дзяржпадтрымкі "пакуль не праглядаюцца". У той самы час ён падкрэсліў, што прэферэнцыі і меры дзяржпадтрымкі прадпрыемстваў канцэрна патрэбныя, бо дапамагаюць стабілізаваць сітуацыю на праблемных прадпрыемствах з вялікай колькасцю працоўных.

Магчымае выключэнне Беларусі з Генеральнай сістэмы прэферэнцый Еўразвяза (ГСП) можа нанесці шкоду найбольш буйным прадпрыемствам-экспарцёрам канцэрна "Беллегпром", заявіў Анатоль Гураў.

"Пралічыць наступствы ад выключэння Беларусі з Генеральнай сістэмы прэферэнцый па канцэрне будзе вельмі складана. Але ўжо цяпер можна сказаць, што пацерпяць такія буйныя экспарцёры, як Аршанскі і Баранавіцкі ільнокамбінаты, ААТ "Магатэкс", кампанія "Элема", – сказаў А.Гураў.

Паводле яго дадзеных, у студзені–красавіку з агульнага аб`ёму экспарту прадпрыемстваў канцэрна ў памеры 182,6 мільёнаў даляраў 44 мільёна склаў экспарт у далёкае замежжа. Сярод найбольш буйных партнёраў па знешнеэканамічнай дзейнасці – Нямеччына, краіны Балтыі, іншыя дзяржавы Еўразвяза.

А. Гураў адзначыў, што прадпрыемствы канцэрна экспартуюць сваю прадукцыю больш як у 50 краін свету і вядуць нязменны пошук новых рынкаў збыту.