Для міністра адмена льгот не страта :: Хартыя'97 :: Навiны

Малаважная частка донараў крыві "нешта страціла", у сувязі з упарадкаваннем сацыяльных ільгот. Пра гэта 7 чэрвеня заявіў міністр працы і сацыяльнай абароны Уладзімір Патупчык, каментуючы па просьбе БелаПАН інфармацыю пра акцыю пратэсту донараў, якая рыхтуецца ў Магілёве.

"Я магу сказаць адно: шматлікія гэтыя рэчы атрымоўваюцца ў сувязі з тым, што людзі не да канца ведаюць тыя правы, якія яны маюць у рамках дзейнага заканадаўства, – сказаў міністр. – Трэба сустракацца з гэтай катэгорыяй людзей, тлумачыць ім тыя прынцыпы, якія закладзеныя ў законе аб удасканаленні сацыяльных ільгот, і тое, што дзяржава мае намер рабіць у гэтай частцы". Ад далейшых каментараў з нагоды сітуацыі ў Магілёве міністр адмовіўся.

Самі донары каментуюць сітуацыю наступным чынам: "Нас хочуць пазбавіць самых неабходных ільгот, – заявіў ганаровы донар Беларусі Ігар Каваленка. – Гэта 50-адсоткавая скідка на пратэзаванне зубоў, 50-адсоткавая аплата кошту лекаў, 40-адсоткавая дапамога да пенсіі. Людзі, якія рэгулярна здаюць кроў і плазму, у нейкай меры ахвяруюць сваім здароўем. Напрыклад, пры здачы плазмы арганізм губляе кальцый, псуюцца зубы, таму скідка на пратэзаванне для нас актуальная".

Нагадаем, 20–27 чэрвеня магілёўскія донары маюць намер правесці папераджальны страйк. "Цягам гэтага тыдня донары перастануць наведваць абласную станцыю пералівання крыві. Калі гэта не дасць вынікаў, донары гатовыя абвясціць бестэрміновы страйк", – адзначыў Ігар Каваленка.