Следам за Эстоніяй і Літва заявіла, што Расеі не месца ў G8 :: Хартыя'97 :: Навiны

Следам за прэзідэнтам Эстоніі, які запатрабаваў выгнаць Расею з G8, прэм`ер-міністр Літвы Гедымін Кіркілас паставіў пад сумнеў мэтазгоднасць удзелу Расеі ў "вялікай васьмёрцы". "Кіраўнікам Расеі варта падумаць, ці з`яўляюцца яны адэкватнымі партнёрамі іншым дэмакратычным развітым краінам свету не толькі наконт эканомікі, але і развіцця дэмакратыі, захавання правоў чалавека", – сказаў Кіркілас у чацвер у інтэрв`ю прыватнаму радыё Ziniu radijas, перадае NEWSru.com са спасылкай на "Інтэрфакс".

Ён адзначыў, што "краіны, якія з`яўляюцца сябрамі якіх-небудзь інстытутаў, міжнародных форумаў звычайна прытрымліваюцца аднолькавых прынцыпаў і каштоўнасцяў".

"Расея ў G8 была прынятая ў час Барыса Ельцына з вялікім авансам, разлічваючы, што яна і надалей пойдзе па шляху рынкавай эканомікі і дэмакратыі, але цяпер шматлікія краіны ў Расеі бачаць іншыя прыкметы", – заявіў Кіркілас. Таксама, на яго думку, напруга ў стасунках паміж Еўропай і Расеяй будзе нарастаць, асабліва ў сувязі з надыходзячымі парламенцкімі і прэзідэнцкімі выбарамі ў краіне.

"Ёсць шмат напругі ў самім грамадстве ў Расеі, што відаць з дзеянняў, рэакцыі ўлад нават на самыя малаважныя акцыі апазіцыі. Адпаведна Расея паступае і на міжнароднай арэне – яна становіцца ўсё больш агрэсіўнай", – адзначыў прэм`ер.

"Карта замежнай палітыкі з`яўляецца вельмі важнай для ўнутранай палітыкі Расеі – там такая сітуацыя, што робяць спробы шукаць вінаватых за тыя ці іншыя няўдачы – звычайна імі аб`яўляюць краіны Захаду або суседнія дзяржавы", – лічыць Кіркілас. Нагадаем, што напярэдадні прэзідэнт Эстоніі Тоомас Хендрык Ільвес, выступаючы на канферэнцыі ў Празе "Дэмакратыя і бяспека", фактычна выказаўся супраць удзелу Расеі ў "вялікай васьмёрцы". "Калі праўда тое, што дэмакратычныя краіны не ваююць адзін з адным, то чаму працягвае быць сябрам G8 краіна, якая пагражае суседзям, пагражае накіраваць ядзерныя ракеты на Еўропу?" – заявіў Ільвес.