Шчукін: Суддзя растаптала Канстытуцыю :: Хартыя'97 :: Навiны

Суддзя Першамайскага раёна Віцебска Гур’ян адмовіла ў допуску Святланы Баранкоўскай у якасці прадстаўніка Валерыя Шчукіна ў судзе. Праваабаронца, якога судзяць па абвінавачванні ў абразе сябраў выбарчых камісій, расцаніў гэта як парушэнне яго правоў. “Мяне пазбавілі прававой дапамогі, – заявіў ён. – Тым самым суддзя растаптала Канстытуцыю”.

Святлана Баранкоўская не дапушчаная ў якасці прадстаўніка Шчукіна на той падставе, што не з`яўляецца яго сваячкай. Гэтая норма змешчаная ў Крымінальна-працэсуальным кодэксе. “Але яна супярэчыць Канстытуцыі, – заявіў Шчукін у інтэрв`ю прэс-службе АГП. – У артыкуле 62 Асноўнага закона адзначаецца, што грамадзянін у любы момант у дзяржаўнай і грамадскай структуры, у тым ліку ў судзе, можа карыстацца дапамогай адваката і іншых сваіх прадстаўнікоў, – адзначыў Шчукін. – Але пракурор паставіў КПК вышэй за Канстытуцыю”.

Суддзя Гур`ян абвясціла, што ў дачыненні Валера Шчукіна захоўваецца мера спынення – падпіска аб нявыездзе. Аднак, як растлумачыў абвінавачваны Шчукін, які мае статус бамжа, падпіска аб нявыездзе была абвешчаная яму следчым Гердавым, але ён яе не падпісаў. Таму мяркуе, што меры спынення ў дачыненні яго няма, пра што і заявіў суддзі, прапаноўваючы выправіць памылку ў судовай пастанове. Гэтае хадайніцтва праваабаронцы было таксама адхіленае, як і просьба аб правядзенні ў судзе відэаздымкі.

Старшыня акруговай камісіі па выбарах дэпутатаў у Віцебскі абласны савет Ала Калеснік запатрабавала, каб суд быў закрытым. Яна растлумачыла гэта тым, што крымінальная справа закранае яе гонар і годнасць. Пракурор Талкачоў падтрымаў гэтае патрабаванне. Суддзя адхіліла хадайніцтва. Працэс вырашана праводзіць адкрытым.

Паседжанне 6 чэрвеня цягнулася да 19.30. Як мяркуе Валеры Шчукін, суддзя спяшаецца скончыць разгляд крымінальнай справы.

7 чэрвеня ў судзе Першамайскага раёна Віцебска судовы працэс па справе Валерыя Шчукіна пачнецца ў 10.00.